គ្រូ​បង្រៀន​​​​​​ដែល​​​ជា​​​សមាជិក​​​សមាគម​​​គ្រូ​​​បង្រៀន​​​កម្ពុជា​​​​​​​នឹង​ធ្វើកូដកម្មទាម​ទារ​ដំឡើង​ប្រាក់​ខែ​​

គ្រូ​បង្រៀន និងសមាគមគ្រូ​បង្រៀន​កម្ពុជា​​​​​​​ឯក​រាជ្យ​បាន​លើក​ឡើង​កាល​ពី​ម្សិល​មិញ​ថា គ្រូ​បង្រៀន​​នៅ​ទូ​ទាំង​ប្រទេស​នឹង​ចាប់​ផ្តើម​​​​ធ្វើ​​​​​​កូដកម្ម​ឡើង​វិញ​នៅ​ថ្ងៃនេះ​ ដើម្បី​​​​​ទាម​ទារ​ដំឡើង​ប្រាក់​ខែឲ្យ​បាន​​២៥០​ដុល្លារ​ក្នុង​មួយ​ខែ​។

គ្រូ​បង្រៀន​ក្នុង​រាជ​ធានី​ភ្នំពេញ​ និង​យ៉ាង​​​ហោច​ណាស់​ក្នុង​ខេត្ត​ចំនួន​ប្រាំទៀត​ កាល​ពី​ថ្ងៃច័ន្ទ​បាន​ចាប់​ផ្តើម​ធ្វើ​កូដ​កម្ម​ដាច់​ដោយ​ឡែក​ពី​គ្នា​បន្ទាប់ពី​ លោក រ៉ុង​ ឈុន ប្រធាន​សមា​​​គម​គ្រូ​បង្រៀន​កម្ពុជា​ឯក​រាជ្យ​បាន​អំពាវ​នាវ​ឲ្យ​ធ្វើ​កូដកម្ម​នៅ​ទូទាំង​ប្រទេស​​​​​​​កាល​ពី​សប្តាហ៍មុន។ ទោះ​​​ជា​​​​យ៉ាងណា កូដ​កម្ម​កាល​ពី​ថ្ងៃច័ន្ទ​មិន​ត្រូវ​បាន​សម្រប​សម្រួល​​ទេ ​បន្ទាប់ពី​លោក រ៉ុង ​​ឈុន នៅតែ​មិន​អាច​ទាក់ទង​​បាន​​អស់​រយៈ​​​​​​​​​ពេល​បី​ថ្ងៃហើយ​​​​ចាប់​​​តាំង​​​​ពី​ចុង​​សប្តាហ៍​​​​មក​​​។

កាល​ពីសប្តាហ៍​មុន លោក​ត្រូវ​បាន​កោះ​ហៅ​ឲ្យមក​បង្ហាញ​ខ្លួន​នៅ​តុលាការ​នៅ​ថ្ងៃ​ទី​១៤​​ ខែមករា ជុំវិញការ​ចោទ​ប្រកាន់​ទាក់​​​ទង​​​ទៅ​នឹង​សកម្មភាព​របស់​លោក​​។ ដោយ​​សំដៅដល់​ព័ត៌មាន​​ដែល​ថា កម្លាំង​សន្តិសុខ​ត្រូវ​បាន​​ដាក់​ពង្រាយ​នៅ​តាម​សាលា​​​​រៀន​យ៉ាង​ហោច​ណាច់​ចំនួន​ពីរ​ដែល​មាន​កូដកម្ម​កើត​ឡើង​កាល​ពី​ថ្ងៃ​ច័ន្ទ​នោះ លោក រ៉ុង​ ឈុន បាន​មាន​ប្រសាសន៍​ កាល​ពីម្សិល​​​មិញថា “យើង​នឹង​បន្ត​ធ្វើ​កូដ​កម្ម​ទៀត​ ប៉ុន្តែ យើង​កំពុង​តែ​ពិនិត្យ​មើល​ស្ថានភាព​។

ប្រសិន​​​​​​​​​​​​​បើ​ពួកគេ​ដាក់​ពង្រាយ​កង​កម្លាំង​បន្ថែម​នោះ​ យើង​នឹង​ប្រាប់​​ [គ្រូបង្រៀនទាំងអស់] ឲ្យ​នៅ​ស្ងៀម​ស្ងាត់​ ហើយ​អង្គុយ​ក្នុង​ថ្នាក់​​រៀន ប៉ុន្តែ​​​កុំ​បង្រៀន​”។ ​គ្រូ​​ប​ង្រៀនមួយ​ចំនួនដែល​​​​​​មាន​​​ការ​​​ប្រុង​​​ប្រយ័ត្ន​​​​បន្ទាប់​ពី​​​​មិន​​​បាន​​​ដឹង​​​ពី​​​លោក រ៉ុង  ឈុន កាល​ពីថ្ងៃ​ច័ន្ទ​នោះ មាន​ការ​ប្តេជ្ញា​ចិត្ត​យ៉ាង​ខ្លាំង​កាលពីម្សិលមិញដោយ​​លើក​ឡើង​​​​ថា ពួកគាត់​នឹង​ធ្វើ​កូដកម្ម​រហូ​ត​ដល់​​រដ្ឋាភិបាល​​​​​​​ឆ្លើយ​តប​តាម​ការ​ទាម​ទារ​របស់​ខ្លួន​។

គ្រូបង្រៀន​ម្នាក់ឈ្មោះ​ ​អ៊ុក ឆាយ៉ាវី ជា​សមា​ជិក​សមាគម​គ្រូបង្រៀន​កម្ពុជា​ឯករាជ្យ​ដែល​បង្រៀន​នៅ​វិទ្យាល័យ​ជ័យ​វរ្ម័ន​ទី​៧​ក្នុង​ស្រុក​កៀន​ស្វាយ​ ខេត្ត​កណ្តាល​បាន​មាន​ប្រសាសន៍​ថា “ [ថ្ងៃ​នេះ​]​ ខ្ញុំ​មិន​បង្រៀន​ទេ ហើយ​ថ្ងៃ​បន្ទាប់​ខ្ញុំ​នឹង​ទៅ​សាលា​រៀន​ តែ​ខ្ញុំ​មិន​​បង្រៀន​”។ គាត់បាន​មាន​ប្រសាសន៍ថា “យើង​នឹង​ធ្វើ​​កូដកម្ម​រហូត​ដល់​រដ្ឋាភិបាល​ផ្តល់​ប្រាក់​​ខែ​គោល​ដល់​ពួកយើង​ឲ្យ​បាន​​២៥០​ដុល្លារ​”។

មាន​គ្រូបង្រៀន​ចំនួន​៨៧.០០០នាក់​បង្រៀន​នៅ​តាម​សាលា​ចំនួន​១១.៣៧០​កន្លែង​ក្នុង​ប្រទេស​កម្ពុជា ហើយ​សមាគម​គ្រូ​បង្រៀន​កម្ពុជា​ឯករាជ្យ​មាន​សមាជិក​ច្រើន​ជាង​១០.០០០នាក់​។

លោក សេង ធី ជា​គ្រូបង្រៀន​នៅ​សាលា​បឋ​មសិក្សា​ នរោត្តម រណប្ញទ្ធិ ក្នុង​ស្រុក​គង​ពិសី ខេត្ត​កំពង់​ស្ពឺ​បាន​មាន​ប្រសា​សន៍​ថា គ្រូ​​​បង្រៀន​ចំនួន​៣៨​នាក់​​នៅ​ទី​នោះ​​សម្រេច​ជា​ឯកច្ឆន្ទ​ថានឹង​ធ្វើ​កូដកម្ម​។ លោក សេង ធី បាន​មាន​ប្រសាសន៍​ថា “នាយក​សាលា​បាន​ប្រាប់​យើង​ថា មាន​ការ​ហាម​ឃាត់​មិន​ឲ្យ​ធ្វើ​កូដកម្ម ប៉ុន្តែ ប្រសិន​​បើ​យើង​ទាំង​អស់​គ្នា​រួបរួម​គ្នា តើ​គេ​អាច​ធ្វើ​អ្វី​ពួកយើង​បាន​?”។

លោក រស់​ សាលីន ប្រធាន​ខុទ្ទ​កាល័យ​ក្រសួង​អប​រំ​​មាន​ប្រសាសន៍​ថា គ្រូ​បង្រៀន​​​​​​​ទាំង​អស់​តម្រូវឲ្យ​​បង្រៀន​នៅ​ថ្ងៃ​នេះ​​។ លោក​បាន​មាន​ប្រសាសន៍ថា “ [ថ្ងៃ​នេះ​] គឺ​ជាថ្ងៃ​ធ្វើការ​…គ្រូ​បង្រៀន​ទាំង​អស់​ត្រូវ​មក​បង្រៀនដូច​​ធម្មតា​”។ លោក​បាន​បន្ថែម​ថា “ក្រសួង​នឹង​ធ្វើការ​ពន្យល់​អំពី​ផល​ប៉ះពាល់​អវិជ្ជ​មាន​ដោយ​សារ​ការ​ធ្វើ​កូដកម្ម​របស់​ [គ្រូ​បង្រៀន] ហើយ​យើង​មិន​ទាន់​មាន គម្រោង​ផ្សេង​បន្ទាប់​ពី​​​នេះឡើយ​”៕សារុន
(រាយ​ការណ៍​បន្ថែម​ដោយ អូន ភាព​)​​​

ព័ត៌មាន​ថ្មីៗ

ព្រះរាជអាជ្ញា​អម​សាលាដំបូង​ខេត្ត​ព្រះសីហនុ ដែល​បាន​យល់ស្រប​នឹង​សេចក្តី​ជូនដំណឹង ដែល​បង្គាប់​ឲ្យ​មហាសេដ្ឋី​រុស្ស៊ី​ដែល​រត់​គេច​ខ្លួន លោក សេរហ្គេ ប៉ូឡុនស្គី ចេញពី​កោះ​ឯកជន​របស់​លោក​នៅ​ឯនាយ​ឆ្នេរ​សមុទ្រ​ខេត្ត​ព្រះសីហនុ ត្រឹម​ថ្ងៃ​ទី​១៥​ខែ​ធ្នូ​នោះ បាន​មាន​ប្រសាសន៍​កាលពី​ថ្ងៃ​ព្រហស្បតិ៍​ថា តុលាការ​នឹង​មិន​ចាត់​វិធាន​ការ​បន្ទាន់​ដេញ​លោក​ ប៉ូឡុនស្គី នោះ​ទេ។ សេចក្តី​ជូនដំណឹង ដែល​ជំរុញ​​ឲ្យ​មាន​ការ​អនុវត្ត​ដីកា​សម្រេច​រក្សា​ការពារ​កាលពី​ខែ​មិថុនា ដែល​ចេញ​ដោយ​តុលាការ​ខេត្ត តម្រូវ​ឲ្យ​លោក ប៉ូឡុនស្គី ចាកចេញ​ពី​កោះ ដែកគោល ដោយ​សំអាង​ហេតុផល​ថា កោះ​នេះ​ជា​កម្ម​សិទ្ធិ​របស់​លោក នីកូឡាយ ដូរ៉ូសេនកូ​ ដែល​ជា​គូ​ប្រជែង​របស់​លោក ប៉ូឡុនស្គី។ ប៉ូឡុនស្គី ត្រូវ​គេ​តាម​ចាប់​នៅ​ប្រទេស​រុស្ស៊ី​ពីបទ​កេង​បន្លំ​យក​ប្រាក់​រាប់​លាន​ដុល្លារ។ លោកស្រី ចាត សូរស្មី ព្រះរាជអាជ្ញា​តុលាការ​ខេត្ត​ព្រះសីហនុ បាន​មាន​ប្រសាសន៍​ថា “យើង​បាន​បញ្ជូន​សេចក្តី​ជូនដំណឹង​មួយ​មាន​ទាំង​កាល​កំណត់​ឲ្យ​លោក ប៉ូឡុនស្គី ចាកចេញ​ពី​កោះ​ដែកគោល​ដោយ​ស្ម័គ្រ​ចិត្ត។ ប៉ូឡុនស្គី​ កំពុង​រស់នៅ​លើ​កោះ​ដែកគោល​នៅ​ឡើយ ហើយ​យើង​មិន​ទាន់​បាន​កំណត់​កាល​បរិច្ឆេទ​អនុវត្ត​[ដីកា​សម្រេច​រក្សា​ការពារ]​ទេ”។ កាលពី​ថ្ងៃ​អង្គារ មេធាវី​ម្នាក់​របស់​លោក ដូរ៉ូសេនកូ ដែល​ជា​ម្ចាស់​រួមគ្នា​លើ​ទ្រព្យ​មួយ​ចំនួន​ជាមួយ​លោក ប៉ូឡុនស្គី បាន​និយាយ​ថា កូនក្តី​របស់​លោក​បាន​ជំរុញ​ឲ្យ​តុលាការ​អនុវត្ត​តាម​ដីកា​សម្រេច​រក្សា​ការពារ ដោយសារ​មាន​ជម្លោះ​មួយ​ចំនួន​នាពេល​ថ្មីៗ​នេះ​រវាង​អ្នក​ទាំង​ពីរ។ កាលពី​ដើមខែ​មុន លោក ដូរ៉ូសេនកូ បាន​ចោទ​លោក ប៉ូឡុនស្គី ថា​បាន​បញ្ជា​ឲ្យ​មាន​ការ​វាយ​តប់​កូន​ប្រុស​របស់​គាត់ ឈ្មោះ អូស្តាប។ លោក ប៉ូឡុនស្គី បាន​បដិសេធ​ថា​មិន​បាន​ជាប់​ពាក់ព័ន្ធ […]

កាលពី​ថ្ងៃ​ព្រហស្បតិ៍ រដ្ឋាភិបាល​បាន​ទទួល​យក​ជា​ផ្លូវការ​នូវ​សំណើ​មួយ​ពី​ថ្នាក់​ដឹកនាំ​សង្ឃ​ជាន់​ខ្ពស់ ដើម្បី​ពិចារណា​ធ្វើ​សេចក្តី​ព្រាង​ច្បាប់​មួយ ដែល​នឹង​ហាម​ព្រះសង្ឃ​ជាង​៥០.០០០​អង្គ​ក្នុង​ប្រទេស​កម្ពុជា​មិន​ឲ្យ​បោះ​ឆ្នោត។ នៅ​ពេល​ចាប់ផ្តើម​អនុសំវច្ឆរ​មហាសន្និបាត​មន្ត្រី​សង្ឃ​រយៈពេល​ពីរ​ថ្ងៃ​ក្នុង​ក្រុង​ភ្នំពេញ​កាលពី​ថ្ងៃ​ពុធ ថ្នាក់​ដឹកនាំ​សង្ឃ​ទាំង​ពីរ​និកាយ​ក្នុង​ប្រទេស​កម្ពុជា​បាន​បិណ្ឌបាត​រដ្ឋាភិបាល​ឲ្យ​ព្រាង​ច្បាប់​មួយ​ដែល​នឹង​ចាត់ទុក​ថា​ខុស​ច្បាប់ ចំពោះ​សង្ឃ​ចូលរួម​បោះ​ឆ្នោត គាំទ្រ​គណបក្ស​នយោបាយ​ណាមួយ ឬ​ចូលរួម​ក្នុង​សកម្មភាព​បោះ​ឆ្នោត។ នៅ​ពេល​បញ្ចប់​មហា​សន្និបាត​សង្ឃ​កាលពី​ថ្ងៃ​ព្រហស្បតិ៍ ឧបនាយក​រដ្ឋមន្ត្រី ម៉ែន សំអន និង​ជា​រដ្ឋមន្ត្រី​ក្រសួង​ទំនាក់​ទំនង​សភា ព្រឹទ្ធ​សភា និង​អធិការ​កិច្ច បាន​យល់ព្រម​បញ្ជូន​សំណើ​នោះ​បន្ត​ដើម្បី​ពិចារណា។ លោកស្រី ម៉ែន សំអន ដែល​ជា​សមាជិក​សភា​មួយ​រូប​របស់​គណបក្ស​ប្រជាជន​កម្ពុជា​កាន់​អំណាច​ដែរ បាន​មាន​ប្រសាសន៍​ថា “ខ្ញុំ​សូម​ទទួល​យក​សំណើ​នេះ និង​នឹង​បញ្ជូន​ទៅ​ប្រមុខ​រដ្ឋាភិបាល ដើម្បី​ពិនិត្យ​និង​សម្រេច”។ សំណើ​ពី​ថ្នាក់​ដឹកនាំ​សង្ឃ​ធ្វើ​ឡើង​បន្ទាប់ពី​រយៈ​ពេល​មួយ​ឆ្នាំ ដែល​ក្នុង​រយៈ​ពេល​នោះ ព្រះ​សង្ឃ​មួយ​ចំនួន​តូច​ប៉ុន្តែ​កាន់តែ​កើន​ចំនួន​ឡើង បាន​រិះគន់​ឥត​សំចៃ​រឹតតែ​ខ្លាំង​ចំពោះ​ការ​គ្រប់គ្រង​របស់​គណបក្ស​ប្រជាជន​កម្ពុជា ហើយ​ជា​ញឹកញាប់​បាន​ចូលរួម​និង​ដឹកនាំ​ការ​តវ៉ា​ប្រឆាំង​នយោបាយ​និង​ទង្វើ​របស់​រដ្ឋាភិបាល។ រដ្ឋធម្មនុញ្ញ​បច្ចុប្បន្ន​ធានា​សិទ្ធិ​បោះ​ឆ្នោត​របស់​ពលរដ្ឋ​កម្ពុជា​គ្រប់​រូប​ដែល​មាន​អាយុ​១៨​ឆ្នាំ​ឡើង៕មានិត  

អ្នក​​​ជំនាញ​​​អន្តរជាតិ​​​ជា​​​និច្ច​​​កាល​​​​​​តែង​​​តែ​​​ធ្វើ​​​ដំណើរ​​​មក​​​ប្រទេស​​​កម្ពុជា​​​ ដើម្បី​​​រៀប​​​ចំ​​​សិក្ខាសាលា​​​ ឬ​​​ផ្តល់​​​ចំណេះ​​​ដឹង​​​ដល់​​​ពល​​​រដ្ឋ​​​មូល​​​ដ្ឋាន​​​ ប៉ុន្តែ អ្នក​​​ស្រាវ​​​ជ្រាវ​​​របស់​​​ប្រទេស​​​អូស្ត្រា​​​លី​​​ទើប​​​តែ​​​បញ្ចប់​​​ការ​​​ចុះ​​​សិក្សា​​​ដល់​​​ទី​​​កន្លែង​​​​​​នៅ​​​ក្នុង​​​ខេត្ត​​​បាត់​​​ដំបង កំពង់​​​ស្ពឺ និង​​​ខេត្ត​​​កណ្ដាល​​​ជា​​​ទី​​​ដែល​​​ពួក​​​គេ​​​បាន​​​ចំណាយ​​​ពេល​​​ជិត​​​ពីរ​​​សប្តាហ៍​​​ដើម្បី​​​សិក្សា​​​អំពី​​​បច្ចេក​​​ទេស​​​ដែល​​​កសិករ​​​ខ្មែរ​​​ប្រើ​​​ក្នុង​​​ការ​​​ដាំ​​​ស្វាយ​​​។ ក្រុម​​​អ្នក​​​ស្រាវ​​​ជ្រាវ​​​ដែល​​​មក​​​ពីរដ្ឋ​​​ខុស​​​ៗគ្នា​​​ក្នុ​​​ង​​​ប្រទេស​​​អូស្ត្រាលី​​​បាន​​​ចាប់អារម្មណ៍​​​ក្នុង​​​ការ​​​សិក្សា​​​ដើម្បី​​​រក​​​​​​ឲ្យ​​​ឃើញ​​​ពី​​​របៀប​​​ដែល​​​កសិករ​​​ខ្មែរ​​​អាច​​​ទទួល​​​ផល​​​ស្វាយ​​​បាន​​​​​​​​​​​​​​​​​​ពីរ​​​លើក​​​ក្នុង​​​មួយ​​​ឆ្នាំ​​​ ដែល​​​លើក​​​ទី​​​១ ចាប់​​​ពី​​​ខែ​​​មីនា ដល់​​​ខែ​​​ឧសភា ហើយ​​​លើក​​​ទី​​​២ចាប់​​​ពី​​​​​​ចន្លោះ​​​ខែ​​​សីហា ដល់​​​ខែ​​​កុម្ភៈ។ លោក Mark Hickey ប្រធាន​​​ក្រុម​​​​​​ដឹក​​​នាំ​​​គម្រោង​​​មក​​​ពី​​​ក្រសួង​​​អភិវឌ្ឍន៍​កសិ​ឧស្សាហកម្ម​​​(Department of Primary Industries) នៅ​​​រដ្ឋ​​​​​​ New South Wales ​​​បាន​​​លើក​​​ឡើង​​​​តាម​​​រយៈ​​​អីុម៉េល​​​មួយ​​​​​​ថា ផល​​​ប្រយោជន​​​៍​​​ដ៏​​​មាន​​​សក្ដានុពល​​សម្រាប់​​​ប្រទេស​​​អូស្ត្រាលី​​​មាន​​​ពីរ​​​ចំណុច​​​គឺ “ការ​​​យល់​​​ដឹង​​​ឲ្យ​​​កាន់​​​តែ​​​ប្រសើរ​​​អំពី​​​សត្វល្អិត​​​ និង​​​មេរោគ​​​ដែល​​​គ្មាន​​​នៅ​​​ក្នុង​​​ប្រទេស​​​អូស្ត្រាលី​​​សព្វ​​​ថ្ងៃ​​​ និង​​​ដឹង​​​អំពី​​​របៀប​​​ដែល​​​កសិករ​​​ខ្មែរ​​​អាច​​​ប្រមូល​​​ផល​​​ស្វាយ​​​បាន​​​ពីរ​​​ដង​​​ក្នុង​​​មួយ​​​ឆ្នាំ​​​។ តើ​​​កត្តា​​​អ្វី​​​ទៅ ដែល​​​អាច​​​ធ្វើឲ្យ​​​វា​​​ទៅ​​​រួច​​​ដូច្នេះ​​​”។ លោក Hickey បាន​​​លើក​​​ឡើង​​​បន្ថែម​​​ទៀត​​​ថា ការ​​​រក​​​ឲ្យ​​​ឃើញ​​​ពី​​​អាថ៌កំបាំង​​​ដែល​​​នៅ​​​ពី​​​ក្រោយ​​​ “កត្តា​​​ដែល​​​អាច​​​ប្រមូល​​​ផល​​​បាន​​​ពីរ​​​លើក​​​ក្នុង​​​មួយ​​​ឆ្នាំ” និង​​​កត្តា​​​ដែល​​​ជំរុញ​​​ឲ្យ​​​ដើម​​​ស្វាយ​​​ចេញ​​​ផ្កា​​​ខុស​​​រដូវ​​​អាច​​​ធ្វើ​​​ឲ្យ​​​កសិករ​​​អូស្ត្រាលី​​​អាច​​​បង្កើន​​​ប្រាក់​​​ចំណូល​​​របស់​​​ខ្លួន​​​​​​តាម​​​រយៈ​​​ការ​​​ផ្គត់​​​ផ្គង់​​​ផ្លែ​​​ឈើ​​​ដល់​​​អតិថិជន​​​របស់​​​ខ្លួន​​​​​​បាន​​​កាន់​​​តែ​​​ច្រើន​​​ជាង​​​មុន​​​។ ហើយ​​​វា​​​ក៏​​​អាច​​​ជួយ​​​អ្នក​​​វេច​​​ខ្ចប់​​​មាន​​​ការ​​​ងារ​​​ធ្វើ​​​ច្រើន​​​ជាង​​​មុន​​​ ដែល​​​ជួន​​​កាល​​​នៅ​​​ទំនេរ​​​នោះ​​​។ លោក​​​បាន​​​សរសេរ​​​ថា “យើង​​​សង្ឃឹម​​​ថា ឆ្លង​​​កាត់​​​តាម​​​រយៈ​​​ការ​​​សិក្សា​​​អំពី​​​របៀប​​​ប្រមូល​​​ផល​​​ស្វាយ​​​ខុស​​​រដូវ​​​នៅ​​​ទី​​​នេះ​​​ វា​​​នឹង​​​ជួយ​​​ឲ្យ​​​ការ​​​ប្រមូល​​​ផល​​​ស្វាយ​​​នៅ​​​ប្រទេស​​​អូស្ត្រាលី​​​បាន​​​កាន់​​​តែ​​​ប្រសើរ​​​ជាង​​​មុន​​​​​​​​​ ដែល​​​អាច​​​ជួយ​​​ឲ្យ​​​កសិករ​​​អូស្ត្រាលី​​​អាច​​​ផ្គត់​​​ផ្គង់​​​ផ្លែឈើ​​​ទៅ​​​ទី​​​ផ្សារ​​​​​​បាន​​​កាន់តែ​​​ច្រើន​​​ជាង​​​មុន ហើយ​​​វា​​​អាច​​​ជួយ​​​ឲ្យ​​​ការ​​​ប្រមូល​​​ផល​​​វិល​​​មក​​​វិញ​​​ឆាប់​​​រហ័ស​​​ដែល​​​កាល​​​ពីមុន​​​ត្រូវ​​​រង់​​​ចាំ​​​រយៈ​​​ពេល​​​យូរ​​​នោះ​​​”។ លោក​​​បាន​​​​​​សរសេរ​​​បន្ត​​​ថា “ម៉្យាង​​​វិញ​​​ទៀត​​​ វា​​​អាច​​​ជៀស​​​វាង​​​ការ​​​ជន់​​​ជោរ​​​ផ្លែ​​​ឈើ​​​នៅ​​​លើ​​​ទី​​​ផ្សារ​​​នៅ​​​ពេល​​​ដែល​​​កសិករ​​​គ្រប់​​​រូប​​​ប្រមូល​​​ផល​​​ក្នុង​​​រយៈ​​​ពេល​​​ដូច​​​គ្នា​​​​​​”។ លោក Richard Markham អ្នក​​​គ្រប់​​​គ្រង​​​កម្ម​​​វិធី​​​ស្រាវ​​​ជ្រាវ​​​វិទ្យា​សាស្ត្រ​នៃការ​ដាំដុះ​នៅ​​​មជ្ឈមណ្ឌល​​​អូស្ត្រាលី​​​សម្រាប់​​​ការ​​​សិក្សា​​​ស្រាវជ្រាវ​​​កសិកម្ម​​​អន្តរជាតិ​​​ (Australian Center for International Agricultural Research) ដែល​​​ផ្តល់​​​មូល​​​និធិ​​​សម្រាប់​​​គម្រោង​​​ដែល​​​មាន​​​រយៈ​​​ពេល​​​បួន​​​ឆ្នាំ​​​នេះ​​​បាន​​​លើក​​​ឡើង​​​ថា ការ​​​ជំរុញ​​​ឲ្យ​​​ស្វាយ​​​ឆាប់​​​ទទួល​​​បានផល​​​គឺ​​​វា​​​ជា​​​រឿង​​​សំខាន់ ព្រោះ​​​ផ្លែឈើ​​​វា​​​ងាយ​​​នឹង​​​ខូច​​​ខ្លាំង​​​ណាស់​​​មិន​​​អាច​​​ទុក​​​យូរ​​​បាន​​​ឡើយ​​​។ លោក​​​​​​បាន​​​លើក​​​ឡើង​​​តាម​​​រយៈ​​​អីុម៉េល​​​មួយ​​​ថា “នៅ​​​ពេល​​​គេ​​​ជំរុញ​​​ឲ្យ​​​ស្វាយ​​​ឆាប់​​​ទទួល​​​បាន​​​ផល​​​ រដូវ​​​ប្រមូល​​​ផល​​​​​​​​​​​​​​​​​​​​​​​​​​​​​​ក៏​​​កាន់​​​តែ​​​ខ្លី​​​ដែរ ហើយ​​​ដោយ​​​សារ​​​តែ​​​ស្វាយ​​​វា​​​មិន​​​អាច​​​ទុក​​​បាន​​​យូរ​​​ទេ​​​ វា​​​អាច​​​យក​​​ទៅ​​​លក់​​​នៅ​​​ក្នុង​​​ទី​​​ផ្សារ​​​បាន​​​តែ​​​ពីរ​​​បី​​​សប្តាហ៍​​​តែ​​​ប៉ុណ្ណោះ”។ លោក ហ៊ាន វណ្ណហន អគ្គនាយក​​​រង​​​នៃ​​​អគ្គ​​​នាយក​​​​​​ដ្ឋាន​​​កសិកម្ម​​​នៅ​​​ក្រសួង​​​កសិកម្ម​​​បាន​​​លើក​​ឡើង​​​ថា ចម្លើយ​​​សម្រាប់​​​ភាព​​​អាថ៌កំបាំង​​​នៃ​​​ស្វាយ​​​គឺ​​​វា​​​សាមញ្ញ​​​ទេ​​​ ព្រោះ​​​ថា កសិករគ្រាន់​​​តែ​​​ប្រើ​​​ “ជី និង​​​អ័រ​​​ម៉ូន”​​​ បន្ថែម​​​ប៉ុណ្ណោះ​​​ដើម្បី​​​អាច​​​ទទួល​​​បាន​​​ផល​​​ពីរ​​​លើក​​​ក្នុង​​​មួយ​​​ឆ្នាំ​​​នោះ។ លោក​​​បាន​​​មាន​​​ប្រសាសន៍​​​ថា “វា​​​មិន​​​ប៉ះពាល់​​​ដល់​​​ដី​​​សម្រាប់​​​ដាំ​​​ស្វាយ​​​ទេ​​​ ប្រសិន​​​បើ​​​កសិករ​​​ប្រើ​​​វា​​​ត្រឹម​​​ត្រូវ​​​​​​”។ ទោះ​​​ជា​​​យ៉ាងណា លោក​​​ ឆាយ វ៉ាន ប្រធាន​​​សមាគម​​​ស្វាយ​​​​​​​​​​​​​​​​​​​​​នៅ​​​ក្នុង​​​ខេត្ត​​​កំពង់​​​ស្ពឺ​​​បាន​​​លើក​​​ឡើង​​​ថា មា​​​ន​​​តែ​​​កសិករ​​​មួយ​​​ចំនួន​​​តូច​​​ប៉ុណ្ណោះ​​​ក្នុង​​​ខេត្ត​​​របស់​​​លោក​​​ អាច​​​ប្រមូល​​​ផល​​​បាន​​​ពីរ​​​លើក​​​ក្នុង​​​មួយ​​​ឆ្នាំ ព្រោះ​​​កម្ពុជា​​​ខ្វះ​​​ហេដ្ឋារចនាសម្ព័ន្ធ និង​​​តម្រូវ​​​ការ​​​។ លោក​​​បាន​​​មាន​​​ប្រសាសន៍​​​ថា “មាន​​​តែ​​​កសិករ​​​ដាំ​​​ស្វាយ​​​​​​ប្រហែល​​​៣០​​​ភាគ​​​រយ​​​ប៉ុណ្ណោះ​​​នៅ​​​ក្នុង​​​ខេត្ត​​​របស់​​​យើង​​​ ដែល​​​ប្រមូល​​​ផល​​​បាន​​​ពីរ​​​លើក​​​ក្នុង​​​មួយ​​​ឆ្នាំ​​​។ យើង​​​គ្មាន​​​ទី​​​ផ្សារ​​​ទេ​​​ ហើយ​​​មាន​​​ការ​​​ចំណាយ​​​ខ្ពស់​​​លើក​​​សង្វាក់​​​ផលិត​​​កម្ម​​​​​​​​​ ហេតុ​​​ដូច្នេះ​​​កសិករ​​​ភាគ​​​ច្រើន​​​មិន​​​ធ្វើ​​​ដូច្នេះ​​​ឡើយ​​​​​​”។ លោក វ៉ាន បាន​​​លើក​​​ឡើង​​​ថា បន្ទាប់​​​ពី​​​ពិចារណា​​​លើ​​​វិស័យ​​​នេះ​​​ លោក​​​ស្វាគមន៍​​​ចំពោះ​​​ការ​​​មក​​​សិក្សាស្រាវជ្រាវ​​​របស់​​​ក្រុម​​​អ្នក​​​ស្រាវ​​​ជ្រាវ​​​​​​អូស្ត្រាលី​​​​​​ ព្រោះ​​​វា​​​អាច​​​ជួយ​​​កសិករ​​​ខ្មែរ​​​ឲ្យ​​​​​​បង្កើនគុណ​​​ភាព​​​​​​ផលិត​​​របស់​​​ខ្លួន​​​​​​​​​ដល់​​​ស្តង់ដារ​​អន្តរជាតិ​​​ ដើម្បី​​​អាច​​​ឈាន​​​ជើង​​​ចូល​​​ទីផ្សារ​​​ក្រៅ​​​ប្រទេស​​​បាន​​​។ លោក​​​បាន​​​មា​​ន​​​ប្រសាសន៍​​​ថា “យើង​​​ពិត​​​ជា​​​ត្រូវ​​​ការ​​​ជំនួយ​​​បច្ចេក​​​ទេស​​​ពី​​​ដៃគូ​​​អន្តរជាតិ​​​ដើម្បី​​​ជួយ​​​បង្កើន​​​គុណភាព​​​ផ្លែ​​​ស្វាយ​​​របស់​​​​​​យើង​​​ដើម្បី​​​នាំ​​​ចេញ​​​”។ យោង​​​តាម​​​លោក​​​ វណ្ណហន បាន​​​ឲ្យ​​​ដឹង​​​ទៀត​​​ថា គ្មាន​​​ស្ថិតិ​​​ផ្លូវ​​​ការ​​​នោះ​​​ទេ​​​ចំពោះ​​​ការ​​​នាំ​​​ស្វាយ​​​ចេញ​​​ ព្រោះ​​​ផ្លែ​​​ឈើ​​​នេះ​​​​​​ជា​​​រឿយ​​​ៗ​​​​​​តែង​​​តែ​​​ដឹក​​​ចេញ​​​តាម​​​ច្រក​​​​​​ក្រៅ​​​ផ្លូវ​​​ការ​​​ទៅ​​​កាន់​​​ប្រទេស​​​​​​ថៃ​​​ និង​​​ប្រទេស​​​វៀតណាម។ លោក​​​បា​​​ន​​​មាន​​​ប្រសាសន៍​​​ថា ការ​​​ដែល​​​មាន​​​ដង្កូវ​​​ច្រើន​​​រួម​​​ទាំង​​​ស្តង់​​​ដារ​​​អនាម័យ​​​ទាប​​​គឺ​​​ជា​​​កត្តា​​​រារាំង​​​ជា​​​យូរ​​​មក​​​ហើយ​​​ក្នុង​​​ការ​​​នាំ​​​ចេញ​​​”។ ការ​​​នាំ​​​ចេញ​​​ស្វាយ​​​ដែល​​​មាន​​​ការ​​​គ្រប់​​​គ្រង​​​ត្រឹម​​​ត្រូវ​​​ទើប​​​តែ​​​ចាប់ផ្តើម​​​នៅ​​​ដើម​​​ឆ្នាំ​​​នេះ​​​តែ​​​ប៉ុណ្ណោះ​​​ បន្ទាប់​​​ពី​​​លោក​​​ឧកញ៉ា ម៉ុង ឬទ្ធី បង្កើត​​​គម្រោង​​​ដាំ​​​ស្វាយ​​​ដែល​​​មាន​​​ទឹក​​​ប្រាក់​​​ប្រហែល​​​២លាន​​​ដុល្លារ​​​នៅ​​​ក​​​្នុង​​​ខេត្ត​​​ព្រះ​​​សីហនុ។ លោកឧកញ៉ា ម៉ុង ឬទ្ធី ដែល​​​មាន​​​ចម្ការ​​​ស្វាយ​​​​​​ទំហំ​​​៥០០​​​ហិកតា នៅក្នុង​​​ខេត្ត​​​កំពង់​​​ស្ពឺ និង​​​ខេត្ត​​​ព្រះ​​​សីហនុ​​​បាន​​​នាំ​​​ចេញ​​​ស្វាយ​​​ប្រហែល​​​១.២០០​​​តោន​​​ទៅ​​​កាន់​​​ប្រទេស​​​ចិន ហើយ​​​មាន​​​គម្រោង​​​ពង្រីក​​​ដល់​​​ទី​​​ផ្សារ​​​ប្រទេស​​​សិង្ហ​​​បុរី​​​​​​បន្ថែម​​​ទៀត​​​នៅ​​​ឆ្នាំ​​​ក្រោយ​​​​​​។ លោក​​​បាន​​​មាន​​​ប្រសាសន៍​​​ថា “នៅ​​​លើ​​​ទី​​​ផ្សារ​​​អន្តរ​​​ជាតិ​​​គេ​​​មាន​​​តម្រូវ​​​ច្រើន​​​។ រឿង​​​សំខាន់ នោះ​​​គឺ​​​គុណភាព អនាម័យ​​​ និង​​​ការ​​​សម្លាប់​​​មេរោគ​​​។ ហើយ​​​ [អ្នក​​​ទិញ] បាន​​​​​​មក​​​ត្រួត​​​ពិនិត្យ​​​ដើម​​​ស្វាយ​​​មុន​​​ពេល​​​យល់​​​ព្រម​​​​​​ទទួល​​​យក​​​​​កិច្ច​​​ព្រម​​​ព្រៀង​​​​​​នាំ​​​ចេញ​​​”។ ប៉ុន្តែ សូម្បី​​​តែ​​​​​​អ្នក​​​ជំនួញ​​​កសិកម្ម​​​រូប​​​នេះ​​​ដែល​​​ជា​​​អ្នក​​​បង្កើត​​​គម្រោង​​​ដំបូង​​​​​​​​​ធ្វើ​​​ឲ្យ​​​ស្វាយ​​​កម្ពុជា​​​ឈាន​​​ដល់​​​ស្តង់​​​ដារ​​​អន្តរ​​​​​​ជាតិ ក៏​​​ស្វាគមន៍​​​ចំពោះ​​​ជំនួយ​​​ពី​​​ខាង​​​ក្រៅ​​​សម្រាប់​​​ឧស្សាហកម្ម​​​នេះ​​​ផង​​​ដែរ​​​។ លោក​​​បាន​​​មាន​​​ប្រសាសន៍​​​បន្ថែម​​​ថា “វា​​​ជា​​​រឿង​​​ល្អ​​​ ប្រសិន​​​បើ​​​ “អូស្ត្រាលី​​​” អាច​​​ផ្តល់​​​ជំនួយ​​​បច្ចេក​​​ទេស​​​ ព្រោះ​​​ប្រសិន​​​បើ​​​យើង​​​ទទួល​​​មូល​​​និធិ​​​ដោយ​​​គ្មាន​​​ការ​​​ផ្តល់​​​ជំនួយ​​​បច្ចេកទេស​​​នោះ​​​ទេ​​​ យើង​​​នឹង​​​មិន​​​ទទួល​​​បាន​​​ផល​​​ចំណេញ​​​ឡើយ​​​”៕ស៊ុយ​​​ឈាង​​​​​​​​​​​​  

កាលពី​ថ្ងៃ​ព្រហស្បតិ៍ ព្រះសង្ឃ​មួយ​ក្រុម​បាន​ផ្កាប់​បាត្រ​របស់​ព្រះអង្គ​នៅ​ខាង​ក្រៅ​ក្រសួង​យុត្តិធម៌​ក្នុង​ក្រុង​ភ្នំេពញ ដើម្បី​តវ៉ា​ប្រឆាំង​​នឹង​ការ​ដាក់​ពន្ធនាការ​សកម្មជន សមាជិក​បក្ស​ប្រឆាំង និង​ព្រះ​សង្ឃ​១៨​អង្គ​និងនាក់​នា​ពេល​ថ្មីៗ​នេះ។ ព្រះសង្ឃ​និង​សកម្មជន​ជាង​១០០​អង្គ​និងនាក់​បាន​ធ្វើ​បាតុកម្ម​ជាលើក​ដំបូង​នៅ​ខាង​ក្រៅ​សភា​នៅ​ម៉ោង​ប្រហែល​៨​ព្រឹក​កាលពី​ថ្ងៃ​ព្រហស្បតិ៍ បង្ហាញ​ការ​ខក​ចិត្ត​ដែល​ញត្តិ​ដាក់​ទៅ​សភា​កាលពី​ខែ​មុន​មិន​មាន​ការ​ឆ្លើយតប មុនការ​ហែក្បួន​ទៅ​ក្រសួង​យុត្តិធម៌ ដោយ​សង្ឃឹម​ថា​នឹង​ប្រគល់​ញត្តិ​ទៅ​ លោក​​​ អង្គវង្ស វឌ្ឍានា រដ្ឋ​​​មន្ត្រី​​​ក្រសួងយុត្តិធម៌។ ញត្តិ​នោះ​អំពាវនាវ​សុំ​ឲ្យ​ដោះលែង​មនុស្ស​ទាំង​១៨​នាក់។ ព្រះតេជគុណ ហួ សុផាត់ បាន​មាន​សង្ឃ​ដីកា​ថា “គោល​បំណង​របស់​យើង​ថ្ងៃ​នេះគឺ​ចង់​ជួប​លោក អង្គវង្ស វឌ្ឍានា និង​ឲ្យ​លោក​ចេញ​មក​ទទួល​ញត្តិ​ដើម្បី​បង្ហាញ​ថា ក្រសួង​យុត្តិធម៌​អាច​រក​យុត្តិធម៌​ឲ្យ​ប្រជាពលរដ្ឋ”។ រយៈ​ពេល​ពីរ​ម៉ោង​បន្ទាប់មក នៅ​ពេល​លោក អង្គវង្ស វឌ្ឍានា មិន​បាន​ចេញ​បង្ហាញ​មុខ ព្រះសង្ឃ​ប្រហែល​៤០​អង្គ​បាន​ផ្កាប់​បាត្រ​របស់​ព្រះ​អង្គ ជា​កាយវិការ​ជម្នះ​ដែល​បង្ហាញ​ថា ព្រះសង្ឃ​នឹង​មិន​ទទួល​ទេយ្យទាន​ពី​រដ្ឋមន្ត្រី​រូប​នេះ​ទេ។ ព្រះអង្គ ហួ សុផាត់ បាន​ផ្តល់​ការ​ពន្យល់​បន្ថែម​អំពី​កាយវិការ​នេះ​ថា “គម្រប​បាត្រ​ពណ៌​ស​តំណាង​យុត្តិធម៌ រីឯ​បាត​ពណ៌​ខ្មៅ​តំណាង​អយុត្តិធម៌ ដូច្នេះ​ហើយ​យើង​ផ្កាប់​បាត្រ​របស់​យើង​ ដើម្បី​បង្ហាញ​ថា​ប្រទេស​របស់​យើង​ពោរពេញ​ដោយ​អយុត្តិធម៌ ហើយ​ប្រជាជន​បន្ត​រងគ្រោះ​បែប​ណា​នោះ”។ ក្្នុង​ពេល​តវ៉ា​ប្រឆាំង​រដ្ឋាភិបាល​នៅ​ប្រទេស​ភូមា​កាលពី​ឆ្នាំ២០០៧ ព្រះសង្ឃ​ជា​ច្រើន​អង្គ​បាន​ផ្កាប់​បាត្រ​របស់​ព្រះអង្គ ហើយមិន​ព្រម​ទទួល​យក​ទេយ្យទាន​ពី​សមាជិក​នៃ​រដ្ឋាភិបាល​យោធា​ទេ។ ក្នុង​អត្ថបទ​ទស្សនាវដ្តី​ឆ្នាំ​២០០៨ លោក​ស្រី អិុនគ្រិដ ចដធ៍ សាស្ត្រាចារ្យ​ផ្នែក​ព្រះពុទ្ធសាសនា​ដែល​ផ្តោត​លើ​ប្រទេស​ភូមា បាន​ពន្យល់​ថា ខ្លឹមសារ​នៃ​ការ​មិន​ទទួល​យក​ទេយ្យទាន មាន​ន័យ​ជា “ការ​ស្តី​បន្ទោស​ខាង​សីលធម៌”។ លោក​ស្រី​បាន​សរសេរ​អំពី​សកម្មភាព​នេះ ដែល​ភាសា​បាលី​ហៅថា “patam nikkujjana kamma” នោះ​ថា “មិន​ព្រម​ទទួល​យក​ទេយ្យទាន​របស់​អ្នកណា​ម្នាក់ គឺ​បដិសេធ​អ្នកនោះ​នូវ​ឱកាស​ទទួល​បុណ្យ។ […]

ក្រសួង​​​មហាផ្ទៃ​​​បាន​​​អញ្ជើញ​​​តំណាង​​​ចលនា​​​អំណាច​​​ពល​​​រដ្ឋ​​​ខ្មែរ ​​​ជា​ក្រុម​​​ដែល​​​លោក​​​នាយក​​​រដ្ឋមន្ត្រី ហ៊ុន សែន ចាត់​​​ទុក​​​ថា ជា​​​អង្គការ​​​ភេរវកម្ម ដែល​​​មាន​​​​​​បំណង​​​ផ្តួល​​​រំលំ​​​រដ្ឋាភិបាល​​​នោះ ​​​មក​​​សាក​​​សួរ​​​នៅ​​​ថ្ងៃ​​​នេះ អំពី​​​ក្តី​​​សង្ឃឹម​​​របស់​ខ​​​្លួន​​​ក្នុង​​​ការ​​​បង្កើត​​​គណបក្ស​​​នយោបាយ​​​។ ក្រសួ​​​ង​មហាផ្ទៃ​​​ទទួល​​​បាន​​​ការ​​​ដាក់​​​ពាក្យ​​​សុំ​​​បង្កើត​​​គណបក្ស​​​អំណាច​​​ពល​​​រដ្ឋ​​​ខ្មែរ​​​របស់​​​ចលនា​​​អំណាច​​​ពល​​​រដ្ឋ​​​ខ្មែរ​​​កាល​​​ពី​ថ្ងៃ​​​ច័ន្ទ ពី​​​លោក សួន សេរី​រដ្ឋា ប្រធាន​​​ចលនា​​​នេះ​​​ដែល​​​និរទេស​​​ខ្លួន​​​ឯង​​​ ដែល​​​បច្ចុប្បន្ន​​​នេះ​​​ប្រឈម​នឹង​ការ​​​​ផ្តន្ទា​ទោស​​​កំបាំង​​​មុខតាម​​​ការ​​​ចោទ ប្រកាន់​​​ពី​បទ​​​មាន​​​ផែន​​​ការ​​​វាយ​​​ប្រហារ​​​មក​​​​​​លើ​​​រដ្ឋាភិបាល​​​ និង​​​រារាំង​​​ការ​​​បោះ​​​ឆ្នោត​​​ ដែល​​​ការ​​​ចោទ​​​ប្រកាន់​​​ទាំង​​​ពីរ​​​នេះ​​​លោក​​​បាន​​​បដិសេធ​​​។ លោក ឌុច សុន អគ្គនាយក​​​នៃ​​​អគ្គ​នាយកដ្ឋាន​បុគ្គលិក​​​ក្រសួង​​​មហាផ្ទៃ​​​បាន​​​មាន​​​ប្រសាសន៍​​​ថា “ការ​​​អញ្ជើញ​​​មក​​​សាក​​​សួរ​​​នេះ​​​គឺថា​​​យើង​​​អាច​​​ពិនិត្យ​​​មើល​​​ការ​​​ដាក់​​​ពាក្យ​​​សុំ​ជាមួយ​​​គ្នា ហើយ​​​ពួក​​​គេ​​​អាច​​​ស្តាប់​​​អនុសាសន៍​​​មួយ​​​ចំនួន​​​ថា តើ​​​ត្រូវ​​​បង្កើ​​​ត​គណបក្ស​​​នយោបាយ​​​ដូច​ម្តេច​​។ ផ្នែក​​​​​​ខ្លះ​នៃ​ពាក្យ​​​សុំ​​​នេះ​មិន​​​ទាន់​​​ពេញ​​​លេញ​​​ទេ ឧទាហរណ៍​​​បាវចនា​​​គណបក្ស​​​គឺ​​​សរសេរ​​មិន​ត្រឹមត្រូវ​​​ជាដើម”។ នៅ​​​លើ​​​គេ​​​ហ​ទំព័រ​​​របស់​​​ខ្លួន ​​​ចលនា​​​អំណាច​​​ពល​​​រដ្ឋ​​​ខ្មែរ​​​លើក​​​ឡើង​​​ថា ខ្លួន​​​នឹង​​​បញ្ជូន​​​តំណាង​​​ឲ្យទៅ​​​ចូល​​​រួ​​​ម​​​ក្នុង​​​ជំនួប​​​នោះ​​​។ បើ​​​ទោះ​​​ណា​​​ជា​រដ្ឋា​ភិ​បាល​​កោះហៅ​តំណាង​ចលនា​នេះ​មក​សាក​សួរ​ក៏ដោយ​​​ ក៏​​​លោក ឌុច សុន បាន​​​មាន​​​ប្រសាសន៍​​​ថា តំណាង​​​ទាំង​​​នេះ​​​នឹ​​​ង​​​មិន​​​ត្រូវ​​​ចាប់​​​ខ្លួន​​​ទេ​​​។ បុរស​​​បី​​​នាក់​​​ទៀត​​​ដែល​​​ត្រូវ​​​បាន​​​ចាប់​​​ខ្លួន​​​តាម​ចោទ​ថា​​​ជា​​​សមាជិក​​​របស់​​​ក្រុម​​​ដែរ​នោះ កំពុង​​​​ប្រឈម​​​នឹង​​​ការ​​​ផ្តន្ទា​ទោស​​​ជា​​​មួ​​យ​​​លោក សួន សេរីរដ្ឋា ដែរ​នៅ​​​សាលា​​​ដំបូង​​​រាជ​​​ធានី​​​ភ្នំពេញ​​៕សារុន​​​​​​​​​  

The Cambodia Daily | All the News Without Fear or Favor | The Daily Newspaper of Record Since 1993