មន្ទីរពេទ្យ​ដ៏​ធំដែល​ឧបត្ថម្ភ​ដោយ​ប្រទេស​វៀត​ណាម​​​ នឹង​​ត្រូវ​សម្ពោធ​ឲ្យ​ដំណើរ​ការ​​​នៅ​ខែ​មករា​
ដោយ | November 1, 2013

មន្ត្រី​សាលា​រាជធានី​បាន​ឲ្យ​ដឹង​កាល​ពី​ថ្ងៃ​ពុធ​ថា បន្ទាប់​ពី​​ស្ថិត​ក្រោម​ការ​សាង​សង់​​ជាង​បី​ឆ្នាំ​មក​​ មន្ទីរពេទ្យ​ឯកជន​ចំណាយ​ប្រាក់​សាង​​​​​​​​​​សង់​អស់​១៥​លាន​ដុល្លារ​​ក្នុង​រាជធានី​ភ្នំពេញ​​ ដែលទទួល​បាន​ការ​​​ឧបត្ថម្ភ​រួម​គ្នា​​ដោយ​មន្ទីរពេទ្យ​ចារី​​ដ៏​ល្បី​ក្នុង​ទីក្រុង​ហូជីមិញ និង​​ក្រុម​ហ៊ុន​ស៊ូគីមិុចនោះ​​​​ នឹង​ត្រូវ​​​សម្ពោ​​​ធ​​ឲ្យ​ដំណើរ​ការ​ជា​ផ្លូវ​ការ​នៅ​​ខែ​មករា​។

លោក​ ប៉ា សុជាតិ​វង្ស អភិបាល​​រាជ​ធានី​ភ្នំពេញ ​​បាន​លើក​ឡើង​​អំឡុង​កិច្ច​ប្រជុំ​នៅ​សាលា​រាជធានី​​កាល​ពី​ថ្ងៃ​ពុធ​ថា មន្ទីរពេទ្យ​ភ្នំពេញ​ចារី​ដែល​សាង​សង់​​ឡើង​​លើ​​​​ដី​មួយ​កន្លែង​​ទំហំ​៥ហិកតា ​ក្នុ​ង​សងា្កត់​និរោធ ខណ្ឌ​មានជ័យនោះ​​​ នឹង​ត្រូវ​សម្ពោ​​​ធ​​នៅ​ថ្ងៃ​ទី​១៣ ខែ​មករា​ ប៉ុន្តែ​​នឹង​​ចាប់​ផ្ដើម​​ផ្ដល់​សេវា​ព្យា​​​បាល​​​​​​​ជា​បណ្ដោះ​អាសន្ន​​​នៅ​ចុង​ខែ​នេះ​។
លោក​ បា៉ សុជាតិ​វង្ស បាន​មាន​ប្រសា​សន៍​​​​​​​ថា “ [លោក​នាយក​រដ្ឋ​មន្ត្រី​] ហុ៊ន​ សែន​ និ​ង [​ លោក​ ង្វៀន តានឌុង ] នាយក​រដ្ឋ​មន្ត្រី​វៀត​​​ណាម​​នឹង​​ធ្វើ​ជា​អធិបតី​​​នៅ​​ក្នុង​ពិធី​សម្ពោធ​​​ជា​​​ផ្លូវ​​​ការ​​​នេះ​”។

លោក​ សុខ​ គង់​ ប្រធាន​ក្រុមហ៊ុន​ស៊ូគីមិុច​ ដែល​បាន​ចូល​ហ៊ុន​​៣០​ភាគរយ​​នៅ​ក្នុង​​​ការ​សង​សង់​មន្ទីរ​ពេទ្យ​ថ្មី​នេះ ​​បាន​ឲ្យ​​​ដឹង​​​ថា ការ​សាង​សង​់​មន្ទីរពេទ្យ​នេះ​ គឺ​ធ្វើ​​​ឡើង​​​ក្នុង​​​​បំណង​​កាត់​បន្ថយ​​ការ​ចំណាយ​លើ​ការ​ធ្វើ​ដំណើរ​​របស់​​អ្នក​ជំងឺ​រាប់​ពាន់​នាក់​ ដែល​​​នាំគ្នា​​ទៅ​ប្រទេស​វៀត​ណាម​ ដើម្បីព្យាបាល​ជំងឺ​ជា​រៀង​រាល់​ឆ្នាំ​។

អ្នក​ជំងឺ​ណា​ដែល​មាន​លទ្ធភាព​គឺ​​​តែង​តែ​​ស្វែង​រក​​ការ​ព្យាបាល​​​នៅ​​មន្ទីរពេទ្យ​ឯកជន​​​ដែល​ស្ថិត​នៅ​ក្រៅ​ប្រទេស​កម្ពុជា​ ដោយ​ស្វែង​រក​​ជម្រើស​​ផ្សេង​​ជា​ជាង​ទទួល​​យក​ការ​ព្យាបាល​​​ក្រោម​សេវាសុខភាព​រដ្ឋ​ ដែល​មិន​សូវ​មាន​​បុគ្គលិក​ជំនាញ​ និង​មិន​សូវ​មាន​ការ​ឧប​ត្ថម្ភ​ឲ្យ​បាន​ពេញ​លេញ​នោះ​។

យោង​តាម​​សាលា​រាជធានី​បាន​ឲ្យ​ដឹង​ថា មន្ទីរពេទ្យ​ភ្នំពេញ​​ចារី​​ នឹង​​ផ្ដល​់​សេវា​ព្យា​បាល​​​​​​​ដូច​មន្ទីរពេទ្យ​​ចារី​ ដែល​មាន​​​គ្រែ​ចំនួន​១.២០០​នៅ​ក្នុង​ទីក្រុង​​ហូជីមិញ​ ប៉ុន្តែ​​នឹ​ងជួលតែ​​​វេជ្ជ​បណ្ឌិត​ និងគិលានុបដ្ឋាយិកា​​​កម្ពុជា​​ ដែល​​នឹង​​ទទួល​​​​​បាន​​​ការ​​​បំពាក់​បំប៉ន​បន្ថែម​ចំនួន​ប្រាំ​បី​នៅ​​​​ទីក្រុង​ហូជីមិញស្ដី​អំពី​​វិធី​​​​ព្យាបាល​ និង​រាក​់ទាក់​​អ្នក​​ជំងឺ​​​ប៉ុណ្ណោះ​។

លោក​ ឡុង​ ឌីម៉ង់​ អ្នក​នាំពាក្យ​សាលា​រាជ​ធានី​បាន​ឲ្យ​ដឹង​កាល​ពី​ម្សិលមិញ​ថា បុគ្គលិក​​មន្ទីរពេទ្យ​ឥឡូវ​​កំពុង​តែ​​​រៀប​ចំ​បរិក្ខា​ពេទ្យ​​ទំនើប​ៗ​ដាក់​ចូល​ក្នុង​មន្ទីរពេទ្យ​នេះ​​។
សេចក្ដីថ្លែង​ការណ៍​មួយដែល​​​​ចេញ​​ដោយ​សាលា​រាជធានី​​កាល​ពី​ថ្ងៃ​ពុធ​ មា​​​ន​​​ខ្លឹម​​​សារ​​​​ថា “វេជ្ជបណ្ឌិត​​មួយ​ក្រុម​មាន​គ្នា​​១៤​នាក់​នឹ​ង​ធ្វើ​ដំណើរ​​​ពី​ទីក្រុង​ហូជីមិញ​​ មក​កាន់​ប្រទេស​កម្ពុជា​នៅ​សប្ដាហ៍​ក្រោយ​ ដើម្បី​ត្រួត​ពិនិត្យ​បរិក្ខា​​ពេទ្យ​ទាំង​នេះ​”។

លោក​ ធា គ្រុយ​ រដ្ឋ​លេខាធិកា​រ​នៅ​ក្រសួង​សុខាភិបាល​ បាន​ឲ្យ​ដឹង​ថា ​​ទោះ​បី​ជា​មន្ទីរ​ពេទ្យ​​ភ្នំពេញ​ចារី​​ប្រើ​ឈ្មោះ​តែ​មួយ​​ដូច​មន្ទីរពេទ្យ​ចារី​នៅ​ក្នុង​ទីក្រុង​​ហូជីមិញ​ក៏​ពិត​​​មែន ប៉ុន្តែ​​​​អ្នក​ជំងឺ​មិន​រំពឹង​ថា នឹង​ទទួល​បាន​គុណភាព​ព្យា​បាល​ដូច​មន្ទីរពេទ្យ​​ដើម​នោះ​ទេ​។​

លោក ធា គ្រុយ ​​​មាន​ប្រសាសន៍​ថា“ មន្ទីរ​​​​​​ពេទ្យ​នេះ​​នឹង​ជួល​​វេជ្ជបណ្ឌិត​ និង​​គិលានុ​​​បដ្ឋា​​​យិកា​​​​​កម្ពុជា​ ហេតុ​ដូច្នេះ​​ខ្ញុំ​​មិន​ហ៊ាន​និយាយ​​ថា កា​រ​​​ព្យាបាល​​នឹង​មាន​​គុណ​​​ភាព​ខ្ពស់​​​ដូច​​​មន្ទីរ​ពេទ្យ​ចារី​​នៅ​ក្នុង​ប្រទេស​​វៀត​ណាម​​​ឡើយ​​​​ ព្រោះ​​​​​ពួក​គេ​ [វេជ្ជបណ្ឌិត​វៀតណាម​] សុទ្ធ​តែ​ទទួល​បាន​​ការ​អប់​រំ​​ និង​មាន​បទ​ពិសោ​ធន៍​ពី​ប្រទេស​​​​​​​​​​​​​​​​​​​បារំាង​ និង​ប្រទេស​អភិវឌ្ឍន៍​​ផ្សេង​ៗ​ទៀត​”៕​​​​​​ សុ៊យឈាង​

ព័ត៌មាន​ថ្មីៗ

អាជ្ញាធរ​អប្សរា ដែល​គ្រប់គ្រង​ឧទ្យាន​បុរាណ​អង្គរ​នៅ​ក្រុង​សៀមរាប កាលពី​ថ្ងៃ​ពុធ​បាន​បដិសេធ​ការ​អះអាង​របស់​លោក​ ម៉ម សូណង់ដូ ម្ចាស់​វិទ្យុ​ដ៏​មាន​ប្រជាប្រិយ​កាលពី​សប្តាហ៍​មុន ដែល​ថា ឧទ្យាន​ប្រាសាទ​អង្គរ​ “ត្រូវ​បាន​ជួល” ឲ្យ​ក្រុមហ៊ុន​វៀតណាម។ លោក សូណង់ដូ អ្នក​រិះគន់​រដ្ឋាភិបាល​ល្បី​ឈ្មោះ ដែល​ជា​ម្ចាស់​ស្ថានីយ​វិទ្យុ​សំបុក​ឃ្មុំ បាន​និយាយ​ក្នុង​ពេល​ផ្សាយ​កាលពី​ថ្ងៃ​សុក្រ​ថា ឧទ្យាន​រមណីយ​ដ្ឋាន​ប្រវត្តិ​សាស្ត្រ​អង្គរ​ត្រូវ​បាន​ជួល​ទៅ​ឲ្យ​ក្រុមហ៊ុន​វៀតណាម​សម្រាប់​រយៈ​ពេល​៩៩​ឆ្នាំ។ លោក ម៉ម សូណង់ដូ បាន​មាន​ប្រសាសន៍​ថា “ខ្ញុំ​ចង់​និយាយ​ថា មិន​ថា​យើង​ខ្សោយ​និង​ប្រឈម​ហានិភ័យ​យ៉ាងណា​ទេ យើង​មិន​អាច​ជួល​អង្គរ​វត្ត​ទៅ​ឲ្យ​ក្រុមហ៊ុន​ណាមួយ​ឡើយ។ តើ​មាន​មូលហេតុ​អ្វី? ដឹង​ទេ ព្រោះ​អង្គរ​វត្ត​ជា​អត្តសញ្ញាណ​ជាតិ​របស់​យើង។ មាន​រូប​អង្គរវត្ត​លើ​ទង់ជាតិ​របស់​យើង មាន​អត់? “ដូច្នេះ បើ​ពួកគេ​ជួល​វា​ទៅ​ឲ្យ​វៀតណាម លក់​វា បញ្ចាំ​វា​៩៩​ឆ្នាំ តើ​ទង់ជាតិ​យើង​មាន​ន័យ​អី​ទៀត?” ក្នុង​សេចក្តី​បំភ្លឺ​មួយ​កាលពី​ថ្ងៃ​ពុធ អាជ្ញាធរ​អប្សរា​បាន​បញ្ជាក់​ថា អាជ្ញាធរ​នេះ​តែ​មួយ​គត់​ជា​ស្ថាប័ន​មាន ​”បេសកកម្ម​ការពារ រៀបចំ និង អភិរក្ស​មណីយ​ដ្ឋាន​ប្រវត្តិ​សាស្ត្រ​អង្គរ”។ សេចក្តី​បំភ្លឺ​ឲ្យ​ដឹង​ថា “អង្គរវត្ត​មិន​បាន​ជួល​ឲ្យ​ក្រុមហ៊ុន​ឯកជន​ណាមួយ ឬ​ជន​បរទេស​ណា​ម្នាក់​ ឬ បញ្ចាំ ឬ ជួល​រយៈ​ពេល​៩៩​ឆ្នាំ​ ដូច​ដែល​បាន​លើក​ឡើង​ដោយ​ស្ថានីយ​វិទ្យុ​សំបុក​ឃ្មុំ​ឡើយ”។ បើទោះជា​ ក្រុមហ៊ុន​សូគីម៉ិច ដែល​ជា​របស់​លោក សុខ គង់ ពាណិជ្ជករ​ដ៏​មាន​ឥទ្ធិពល ដែល​ជា​ជនជាតិ​វៀតណាម […]

ខណៈ​ដែល​ពេល​កំណត់​ដាក់​ដោយ​សាលា​ក្រុង​ឲ្យ​ប្រជាពលរដ្ឋ​នៅ​ភូមិ​មួយ​ក្នុង​ខណ្ឌ​ឫស្សីកែវ ក្រុង​ភ្នំពេញ ចេញពី​តំបន់​នោះជិត​មក​ដល់ ពលរដ្ឋ​ប្រហែល​១០០​នាក់​បាន​ដាក់​ញត្តិ​ទៅ​រដ្ឋ​សភា​កាលពី​ថ្ងៃ​ពុធ ជា​កិច្ច​ប្រឹងប្រែង​ចុងក្រោយ ដើម្បី​បញ្ចុះ​បញ្ចូល​សមាជិក​សភា​ឲ្យ​ជួយ​ធ្វើ​អន្តរាគមន៍​តាង​នាម​ពួក​ខ្លួន។ ញត្តិ​នោះ​បានប្រគល់​ទៅ​លោក ជា ប៉ូច និង​លោក ចាន់ ចេង សមាជិក​សភា​គណបក្ស​សង្គ្រោះ​ជាតិ​នៅ​ក្រៅ​រដ្ឋសភា និង​ក៏​បាន​ប្រគល់​ទៅ​លោក គង់ ចំរើន អគ្គលេខាធិការ​នៅ​ខុទ្ទកាល័យ​របស់​លោក​នាយក​រដ្ឋមន្ត្រី ហ៊ុន សែន នៅ​ពេល​ដែល​អ្នក​ភូមិ​ដើរ​ហែ​កាត់​សួន​វត្ត​បទុម​ផង​ដែរ។ ប្រជាពលរដ្ឋ​ជាង៦០០​នាក់​ដែល​រស់​នៅ​ក្នុង​ភូមិ​បឹងឈូក សង្កាត់​គីឡូម៉ែត្រ​លេខ​ប្រាំមួយ បាន​ទទួល​ការ​ជូន​ដំណឹង​មួយ​ពី​សាលាក្រុង​កាលពី​សប្តាហ៍​មុន ដែល​ចុះ​ហត្ថលេខា​ដោយ​អភិបាល​ខណ្ឌ​ ធុយ សុខន ដោយ​ជូន​ដំណឹង​ពួកគាត់​ថា ពួកគាត់​មាន​ពេល​១៥​ថ្ងៃ​ចាប់ពី​ថ្ងៃ​ចុះ​ហត្ថ​លេខា​ គឺ​ថ្ងៃ​ទី​១៤​ខែ​វិច្ឆិកា ត្រូវ​រើ​ផ្ទះ​សំបែង​និង​ទ្រព្យសម្បត្តិ​របស់​ខ្លួន បើ​ពុំ​នោះ​ទេ ត្រូវ​ប្រឈម​នឹង​ការ​បណ្តេញ​ចេញ។ សេចក្តី​ជូន​ដំណឹង​មាន​ខ្លឹមសារ​ថា អាជ្ញាធរ​ខណ្ឌ​មាន​ផែនការ​ពង្រីក​ផ្លូវ​លេខ​១៨០០​ ដែល​ឆ្លងកាត់​ភូមិ​នេះ ហើយ​ថា​ផ្ទះ​សំបែង​របស់​ពួកគាត់​ស្ថិតនៅ​ចំ​ផ្លូវ​ត្រូវ​ពង្រីក។ ប៉ុន្តែ​បើ​ទោះជា​សេចក្តី​ជូនដំណឹង​ចុះ​ហត្ថលេខា​ជិត​ពីរ​សប្តាហ៍​ហើយ​ក៏ដោយ ក៏​អ្នក​ភូមិ​និយាយ​ថា ពួកគាត់​មិន​បាន​ទទួល​សេចក្តី​ជូនដំណឹង​នោះ​ទេ ទើបតែ​ដឹង​កាលពី​ថ្ងៃ​សុក្រ។ ដូច្នេះ​ពួកគាត់​សល់​ពេល​តែ​ជាង​មួយ​សប្តាហ៍​ដើម្បី​រុះរើ​ផ្ទះ ដែល​ពួកគាត់​ខ្លះ​និយាយ​ថា ពួកគាត់​បាន​មក​រស់​នៅ​តាំងពី​ដើម​ទសវត្សរ៍​ឆ្នាំ​១៩៨០​មក​ម៉្លេះ។ លោក សេង ស្នា អាយុ​៥០​ឆ្នាំ តំណាង​សហគមន៍ បាន​និយាយ​ថា “យើង​បាន​រស់នៅ​ក្នុង​តំបន់​នេះ​តាំងពី​ទីនេះ​គ្មាន​អ្វី​សោះ មានតែ​ព្រៃ​និង​លិច​ទឹក​ប៉ុណ្ណោះ”។ លោក ស្នា បាន​និយាយ​ថា គ្មាន​ផ្លូវ​កាត់​តំបន់​នេះ​ទេ […]

​យោង​តាម​​​ម្ចាស់​អាជីវកម្ម និង​​បណ្តា​អ្នក​ជំនាញ​ខាង​ឧស្សាហកម្ម​កៅ​ស៊ូបាន​ឲ្យ​​ដឹង​ថា ពាណិជ្ជកម្ម​កៅ​ស៊ូឆ្លង​ដែន​ខុស​ច្បាប់ កំពុង​​តែ​កាក់​កប​​​ខ្លាំ​ង​នៅ​ក្នុង​ប្រទេស​កម្ពុជា ស្រប​ពេល​​​​តម្លៃ​​កៅ​ស៊ូ​នៅ​លើ​ទី​ផ្សារ​ពិភពលោក​ធ្លាក់​ចុះ​យ៉ាង​គំហុក ​ហើយ​វា​​​កំពុង​តែ​គំរាម​​កំហែង​​ដល់​ក្រុម​ហ៊ុន​​កែ​ច្នៃ​ស្រប​​ច្បាប់​​​​នានា​​​នៅ​ក្នុង​ប្រទេស​​។ ​នៅឆមាស​ទី​១ដើម​​ឆ្នាំ​នេះ​ តម្លៃ​កៅ​ស៊ូ​​ក្នុង​ស្រុក​​​បាន​ធ្លាក់​​ចុះ​ប្រហែល​៣០​ភាគ​រយ​ដោយ​សារ​តែសម្ពាធ​ពិភពលោក ធ្វើ​ឲ្យ​បណ្តា​រោង​ចក្រ​​​រក្សា​ខំ​​​ប្រតិបត្តិការ​បស់​ខ្លួន​ទាំង​ត្រដរ។ ​​​​​​​​​ ហើយ​ខណៈ​​​ដែល​ពន្ធនាំ​ចេញ​កៅ​ស៊ូធម្មជាតិ​​​ត្រូវ​​​បាន​កំណត់​ន្លោះ​ពី​២​ភាគ​យ​ទៅ​១០​ភាគ​រយ ប្រទេស​​វៀតណាម ​បាន​​ចាត់​វិធាន​​​ការ​បន្ធូរ​​បន្ថយផល​​​ប៉ះ​ពាល់​លើ​កសិករ​ដាំ​កៅស៊ូ​របស់​ខ្លួន ដោយ​កាត់​បន្ថយ​ពន្ធ​នាំ​ចេញ​ពី​៥ភាគ​រយ​មក​នៅ​ត្រឹម​១ភាគ​រយ​កាល​ពី​ខែ​ធ្នូ​ឆ្នាំ​មុន មុន​ពេល​លើក​​​លែង​​​ពន្ធ​​​ទាំង​អស់​​កាល​ពី​​ថ្ងៃ​​​ទី​​​​២​ខែ​តុលា។ លោក ប្រាចាយ៉ា ជុំប៉ាស៊ុត (Prachaya Jumpasut) ​នាយក​គ្រប់​គ្រង​​​​ក្រុម​ហ៊ុន​ The Rubber Economist Ltd ​ជា​​​ក្រុម​ហ៊ុន​វិភាគ​​​អំពី​​ឧស្សាហ​កម្ម​​កៅស៊ូ​​​​ដែល​​​មាន​មូល​ដ្ឋាន​នៅ​ក្នុង​ទីក្រុង​ឡុងដ៍ ​បានមាន​ប្រសាសន៍​ថា ពាណិជ្ជកម្ម​កៅ​ស៊ូ​ខុស​ច្បាប់​​នៅ​អាស៊ី​អាគ្នេយ៍ គឺ​ងាយ​នឹងធ្វើ​ឲ្យ​​ប៉ះ​ពាល់​ដល់​​ពន្ធ​​នាំ​ចេញ​ណាស់។ លោក​បាន​លើក​ឡើង​​នៅ​ក្នុង​អីុម៉េល​​​មួយ​ថា “ការ​រត់ពន្ធ​ពិត​ជា​កើត​មាន​​​មែន​​​រ​វាង​ការ​ធ្វើ​ពាណិជ្ជ​កម្ម​​នៅ​ព្រំ​ដែន។ វា​ទំនង​ជា​​មាន​ច្រើន​​ជាង​នេះ​ ​នៅ​​​ពេលមាន​ការ​កែ​ប្រែ​ពន្ធ​​នាំ​ចេញ”។ លោក ហ្វីលីប ម៉ុននីន (Philippe Monnin) ទីប្រឹក្សា​​ផ្នែក​បច្ចេក​ទេស​​នៅ​ទីភ្នាក់​ងារ​អភិវឌ្ឍន៍​បារាំង (French Development Agency) បាន​​លើក​ឡើង​ថា ​កសិករ​​ដាំ​កៅស៊ូកម្ពុជា ជា​ច្រើន​​បាន​បង្ខំ​ចិត្ត​លក់​​​កៅ​ស៊ូ​របស់​​ខ្លួន​ឲ្យ​ទៅ​​​ឈ្នួញ​កណ្តាល​ នៅ​​​ពេល​​​បណ្តា​រោង​ចក្រ​កែ​ច្នៃ​​​ក្នុង​ស្រុក​​គ្មាន​លទ្ធ​ភាព​ទិញ។ លោក​បាន​​មាន​ប្រសាសន៍​ថា “ដោយ​សារតម្លៃ​ធ្លាក់​ចុះ ​រោង​ចក្រ​មាន​​ប្រាក់​តិច​​តួច​សម្រាប់​​​ទិញ​​​ពីម្ចាស់​ចម្ការ​កៅ​ស៊ូ​តូចៗ​​​ដែល​រាល់​ថ្ងៃ​​ត្រូវ​ស្វែង​រក​អ្នក​លក់ ហើយ​ត្រូវ​​បាន​តម្រូវ​ឲ្យ​លក់​​ទៅឲ្យ​ឈ្មួញ​កណ្តាល​ដែល​លក់​​​ចេញ​​​បន្ត​​​​ទៅ​ថៃ និង​វៀតណាម”។ ទោះ​បី​ជា​​​តម្លៃ​​បាន​​ចាប់​ផ្តើម​រើប​ឡើង​​​បន្ទាប់​ពី​​បណ្តា​ប្រទេស​​​ផលិត​កៅ​ស៊ូ​ធំៗ​នៅ​អាស៊ី បាន​​ព្រម​​ព្រៀង​​កំណត់​តម្លៃ​អប្បបរមា​​​កាល​ពី​ខែ​តុលា​ក្តី ក៏​​បណ្តា​ម្ចាស់​រោង​ចក្រ​​និយាយ​ថា ខ្លួន​នៅ​តែ​មិន​អាច​ប្រកួត​ប្រជែង​​ជា​មួយ​អ្នក​ទិញ​នៅ​ក្នុង​ទី​ផ្សារ​ខ្មៅ​​​​ដែល​​កំពុង​សម្លឹង​​មើល​រក​​​ឱកាស​កេង​ចំណេញ​ពី​ការ​លើក​​​លែង​​​ពន្ធ​​​របស់​ប្រទេស​វៀតណាម។ […]

យោង​​​តាម​​​សេចក្តី​​​រាយការណ៍​​​មួយ​​​ចុះ​​​ផ្សាយ​​​ដោយ​​​កាសែត today’s Korea JoongAng Dialy បាន​​​ឲ្យដឹង​​​ថា កាល​​​ពី​​​ថ្ងៃ​​​អង្គារ​​​ នគរបាល​​​កូរ៉េ​​​បាន​​​ចាប់​​​ខ្លួន​​​បុរ​​​សម្នាក់​​​ ពី​​​បទ​​​​​​សង្ស័យ​​​ថា​​​បាន​​​​​​សម្លាប់​​​ប្រពន្ធ​​​ជន​​​ជាតិ​​​ខ្មែរ​​​ ដែល​​​កំពុង​​​មាន​​​ផ្ទៃពោះ​​​ ដើម្បី​​​​​​ប្រមូល​​​ប្រាក់​​​ប្រហែល​​​៨,៥លាន​​​ដុល្លារ​​​ ពី​​​ធានារ៉ាប់​​​រង​​​​​​អាយុជីវិត​​​ដាច់​​​ដោយ​​​ឡែក​​​ពីគ្នា​​​ចំនួន​​​២៦ ដែល​​​បុរស​​​រូប​​​នេះ​​​បាន​​​ទិញ​​​ឲ្យ​​​នាង​​​។ អត្ថបទ​​​កាសែត​​​នេះ​​​​​​បាន​​​ចុះ​​​ផ្សាយ​​​ថា  បុរស​​​អាយុ​​​៤៥​​​ឆ្នាំ ដែល​​​គេ​​​បញ្ចេញ​​​ឈ្មោះ​​​ត្រឹម​​​តែ​​​ថា “Lee” នោះ​​​ត្រូវ​​​បាន​​​សង្ស័យ​​​ថា បាន​​​ឲ្យ​​​ថ្នាំ​​​ងងុយ​​​ដេក​​​ទៅ​​​ប្រពន្ធ​​​ជន​​​ជាតិ​​​ខ្មែរ​​​លេប​​​មុន​​​ពេល​​​បើក​​​រថយន្ត​​​របស់​​​ខ្លួន​​​បុក​​​រថយន្ត​​​ធុន​​​ធំ​​​ ដែល​​​កំពុង​​​ចត​​​​​​នៅ​​​ស្ងៀម​​​មួយ​​​គ្រឿង ខណៈ​​​ប្រពន្ធ​​​របស់​​​ខ្លួន​​​អង្គុយ​​​នៅ​​​កៅអី​​​មុខ​​​ជាប់​​​តៃកុង​​​។ អត្ថបទ​​​កាសែត​​​នេះ​​​មាន​​​ខ្លឹម​​​សារ​​​ដូច្នេះ​​​ថា “នគរ​​​បាល​​​បាន​​​លើក​​​ឡើង​​​ថា លោក Lee បាន​​​បើក​​​រថយន្ត​​​របស់​​​ខ្លួន​​​ទៅ​​​បុក​​​នឹង​​​រថយន្ត​​​​​​ដឹក​​​ទំនិញ​​​ចំណុះ​​​៨​​​តោន ដែល​​​ចត​​​នៅ​​​ចំណត​​​បន្ទាន់​​​មួយ​​​នា​​​វេលា​​​ម៉ោង​​​ប្រហែល​​​៣ និង​​​៤០នាទី​​​ទៀប​​​ភ្លឺ​​​ កាល​​​ពី​​​ថ្ងៃទី​​​២៣​​​ ខែ​​​សីហា​​​។ ប្រពន្ធ​​​របស់​​​គាត់​​​ដែល​​​ជា​​​ជន​​​អន្តោប្រវេសន៍​​​មក​​​ពី​​​ប្រទេស​​​កម្ពុជា​​​គឺ​​​អង្គុយ​​​នៅ​​​កៅ​​​មុខ​​​ជាប់​​​តៃ​​​កុង​​​ហើយ​​​បាន​​​ស្លាប់​​​។ នាង​​​មាន​​​ផ្ទៃពោះ​​​ប្រាំពីរ​​​ខែ​​​ហើយ​​​”។ អត្ថបទ​​​កាសែត​​​នេះ​​​​​​បាន​​​ចុះ​​​ផ្សាយ​​​ទៀត​​​ថា គ្រោះ​​​ថ្នាក់​​​ចរាចរណ៍​​​ដែល​​​បណ្តាល​​​ឲ្យមាន​​​មនុស្ស​​​ស្លាប់​​​នេះ​​​កើត​​​ឡើង​​​នៅ​​​ចម្ងាយ​​​៣៣៥គីឡូម៉ែត្រ ពី​​​ទី​​​ក្រុង​​​ Busan ជា​​​ទីក្រុង​​​ធំទី​​​២ បន្ទាប់​​​ពី​​​ទីក្រុង​​​សេអ៊ូល​​ រីឯ​​​ប្តី​​​ជន​​​ជាតិ​​​កូរ៉េ​​​​​​នោះ គ្រាន់​​​តែ​​​រង​​​របួស​​​ស្រាល​​​តែ​​​ប៉ុណ្ណោះ​​​។ នគរ​​បាល​​​កូរ៉េ​​​ខាង​​​ត្បូង​​​បាន​​​ដក​​​ស្រង់​​​សំដី​​​របស់​​​បុរស​​​នេះ​​​មក​​​ថា  “គ្រោះ​​​ថ្នាក់​​​នេះ​​​កើត​​​ឡើង​​​បន្ទាប់​​​ពី​​​ខ្ញុំ​​​ងោក​​​មួយ​​​ភ្លែត​​​​​​ទៅលើ​​​ចង្កូត​​​រថយន្ត​​​”។ អត្ថបទ​​​កាសែត​​​នេះ​​​មិន​​​បាន​​​ប្រាប់​​​​​​ឲ្យ​​​ដឹង​​​ពី​​​ឈ្មោះ​​​របស់​​​ស្ត្រី​​​ជន​​​ជាតិ​​​ខ្មែរ​​​រូប​​​នេះ​​​​​​ ឬ​​​អត្តសញ្ញាណ​​​របស់​​​នាង​​​ឡើយ ហើយ​​​បាន​​​​​​ចុះ​​​ផ្សាយ​​​ត្រឹម​​​តែ​​​ថា នាង​​​បាន​​​រៀប​​​ការ​​​ក្នុង​​​ឆ្នាំ​​​២០០៨​​​​តែ​​​ប៉ុណ្ណោះ​​​ ។ ហើយ​​​​​​គ្រោះ​​​ថ្នាក់​​​នេះ​​​ដំបូង​​​ឡើយ​​​ត្រូវ​​​នគរ​​​បាល​​​សន្និដ្ឋាន​​​ថា ជា​​​ឧបទ្ទវហេតុ​​​មួយ។ អត្ថបទ​​​កាសែត​​​នេះបាន​​​ចុះ​​​​​​ផ្សាយ​​​បន្ត​​​ទៀត​​​ថា “ករណី​​​នេះ​​​ស្ទើរ​​​តែ​​​ត្រូវ​​​បាន​​​ចាត់​​​ទុក​​​ថា ជា​​​គ្រោះ​​​ថ្នាក់​​​ដ៏​​​សោក​​​នាដកម្ម​​​មួយ​​​ទៅ​​​ហើយ​​​​​​រហូត​​​ដល់​​​នគរ​​​បាល​​​បាន​​​​​​ដឹង​​​ថា លោក Lee ​​​បាន​​​ទិញ​​​​​​ប័ណ្ណ​​​ធានារ៉ាប់រង​​​ដាច់​​​ដោយ​​​ឡែក​​​ពី​​​គ្នា​​​ដល់​​​ទៅ​​​២៦​​​ឲ្យ​​​ប្រពន្ធ​​​របស់​​​ខ្លួន​​​ ​​​ដែល​​​គាត់​​​នឹង​​​ទទួល​​​បាន​​​ប្រាក់​​​សរុប​​​មក​​​វិញ​​​ចំនួន​​​៩,៦ពាន់​​​លាន​​​វ៉ុន [៨.៦៤០.៨៦៤ដុល្លារ​​​]​​​​​​​​​​​​​​​” នោះ​​​។ យោង​​​តាម​​​នគរ​​​បាល​​​បាន​​​ឲ្យ​​​ដឹង​​​ថា ចំនួន​​​ទឹក​​​ប្រាក់សរុប​​​ដែល​​​លោក Lee​​​ ត្រូវ​​​បង់​​​ក្នុង​​​មួយ​​​ខែ​​​ៗ​​​សម្រាប់​​​ធានារ៉ាប់​​​រង​​​ដាច់​​​ដោយ​​​ឡែក​​​ពី​​​គ្នា​​​ទាំង​​​២៦​​​នេះ គឺ​​​ប្រហែល​​​២.៧០០ដុល្លារ។ អត្ថបទ​​​កាសែត​​​នេះ​​​បាន​​​ចុះផ្សាយ​​​បន្ថែម​​​ថា “យោង​​​តាម​​​ការ​​​វិភាគ​​​លើ​​​ខ្សែ​​​អាត់​​​វីដេអូ​​​កាម៉េរា​​​សុវត្ថិភាព​​​ បាន​​​បង្ហាញ​​​ថា លោក Lee ​​​បាន​​​គ្រប់​​​គ្រង​​​រថយន្ត​​​របស់​​​ខ្លួន​​​នៅ​​​ពេល​​​​​​កើត​​​ហេតុ​​​នោះ​​​មិន​​​ដូច​​​អ្នក​​​បើក​​​បរ​​​ដែល​​​ងងុយ​​​ដេក​​​នោះ​​​​​ឡើយ​​​។ លោក Lee បាន​​​បើក​​​ភ្លើង​​​ហ្វា បំភ្លឺ​​​ទៅ​​​ខាង​​​មុខ​​​ចម្ងាយ​​​ប្រមាណ​​​៤០០ម៉ែត្រ​​​ពី​​​រថយន្ត​​​ធុន​​​ធំ​​​ ហើយ​​​បាន​​​បើក​​​ទៅ​​​បុក​​​រថយន្ត​​​នោះ​​​ប្រកប​​​ដោយ​​​ជំនាញ​​​។ លោក Lee បាន​​​ពាក់​​​ខ្សែក្រវាត់​​​សុវត្ថិភាព​​​​​​នៅ​​​ពេល​​​​​​កើត​​​ហេតុ​​​ ចំណែក​​​ប្រពន្ធ​​​របស់​​​គាត់​​​មិន​​​ពាក់​​​នោះ​​​ឡើយ​​​”។ នគរ​​​បាល​​​​​​ត្រូវ​​​បាន​​​គេ​​​ដក​​​ស្រង់​​​សំដី​​​មក​​​​​​ថា “វាមិនអាច​​​ទៅ​​​រួច​​​ទេ​​​ក្នុង​​​ការ​​​គ្រប់​​​គ្រង​​​ចង្កូត​​​រថយន្ត​​​ដូច​​​អ្វី​​​ដែល​​​លោក Lee បាន​​​ធ្វើ​​​ ប្រសិន​​​បើ​​​អ្នក​​​បើក​​​បរ​​​ពិត​​​ជា​​​ងងុយ​​​ដេក​​​មែន​​​នោះ​​​”។ ខ្សែ​​​អាត់​​​វីដេអូ​​​ស្តី​​​ពី​​​គ្រោះ​​​ថ្នាក់​​​កាល​​​ពីថ្ងៃ​​​ទី​​​២៣ ខែសីហា​​​នេះ​​​ ដែល​​​ត្រូវ​​​បាន​​​ចាក់​​​ផ្សាយ​​​តាម​​​កញ្ចក់​​​ទូរទស្សន៍​​​កូរ៉េ​​​ខាង​​​ត្បូង​​​កាល​​​ពី​​​ម្សិល​​​មិញ ​​​បាន​​​បង្ហាញ​​​ថា បើ​​​យោង​​​តាម​​​​​​ភ្លើង​​​ចង្កៀង​​​​​​​​មុខ​​​របស់​​​រថយន្ត​​​នេះ​​​បង្ហាញ​​​ថា រថយន្ត​​​នេះ​​​ស្ថិត​​​ក្នុង​​​ល្បឿន​​​មួយ​​​ថេរ ហើយ​​​បាន​​​បើក​​​ឆ្ពោះ​​​ត្រង់​​​សំដៅ​​​ទៅ​​​រថយន្ត​​​ធុន​​​ធំ​​​ដែល​​​ចត​​​នៅ​​​ស្ងៀម​​​តែ​​​ម្តង​​​។ យោង​​​តាម​​​កាសែត today’s Korea JoongAng Daily  បាន​​​ឲ្យ​​​ដឹង​​​បន្ត​​​ថា​​​ បុរស​​​ជន​​​ជាតិ​​​កូរ៉េ​​​រូប​​​នេះ​​​បាន​​​បដិសេធ​​​ចំពោះ​​​ការ​​​ចោទ​​​ប្រកាន់​​​របស់​​​នគរ​​​បាល​​​ ដែល​​​ថា ករណី​​​នេះ​​​ជា​​​ករណី​​​ឃាត​​​កម្ម​​​។ ពេល​​​ទាក់​​​ទង​​​កាល​​​ពី​​​ម្សិលមិញ លោក សុទ្ធ​​​ ឌីណា ឯក​​​អគ្គរាជ​​​ទូត​​​កម្ពុជា​​​ប្រចាំ​​​ប្រទេស​​​កូរ៉េ​​​ខាង​​​ត្បូង​​​បាន​​​លើក​​​ឡើង​​​ថា លោក​​​កំពុង​​​ទាក់​​​ទង​​​នគរ​​​បាល​​​នៅ​​​កូរ៉េ​​​ខាង​​​ត្បូង​​​ជាប់​​​ជា​​​និច្ច​​​ ប៉ុន្តែ​​​ថា ពួក​​​គេ​​​នៅ​​​មិន​​​ទាន់​​​ផ្តល់​​​របាយការណ៍​​​អំពី​​​ករណី​​​នេះ​​​ទៅ​​​ស្ថាន​​​ទូត​​​របស់​​​លោក​​​នៅ​​​ឡើយ​​​ទេ​​​។ លោក​​​បាន​​​មាន​​​ប្រសាសន៍​​​ថា “ចំពោះ​​​ករណី​​​នេះ​​​ខ្ញុំ​​​កំពុង​​​សហការណ៍​​​ជាមួយ​​​នគរ​​​បាល​​​កូរ៉េ​​​នៅ​​​ឡើយ​​​ ដើម្បី​​​បញ្ជាក់​​​ថា តើ​​​នាង​​​ត្រូវ​​​គេ​​​សម្លាប់​​​ដោយ​​​របៀប​​​ណា​​​។ រហូត​​​មក​​​ទល់​​​ពេល​​​នេះ​​​​​​នគរ​​​បាល​​​​​​កូរ៉េ​​​នៅ​​​មិន​​​ទាន់​​​បង្ហាញ​​​ករណី​​​ពិត​​​ដល់​​​ខ្ញុំ​​​នៅ​​​ឡើយ​​​ទេ​​​ ប៉ុន្តែ ស្ថាន​​​ទូត​​​កម្ពុជា​​​របស់​​​យើង​​​នៅ​​​តែ​​​ព្យាយាម​​​ជំរុញ​​​ឲ្យ​​​ពួកគេ​​​​​​ស្វែង​​​រក​​​មូល​​​ហេតុ​​​ពិត​​​ប្រាក​​​ដ​​​”។ លោក ឌីណា បាន​​​លើក​​​ឡើង​​​ទៀត​​​ថា ស្ត្រី​​​ជន​​​ជាតិ​​​ខ្មែរ​​​រូប​​​នេះ​​​បាន​​​ប្តូរ​​​ឈ្មោះ​​​ទៅ​​​ជា​​​ឈ្មោះ​​​កូរ៉េ បន្ទាប់​​​ពី​​​នាង​​​បាន​​​រៀបការ​​​រួច ប៉ុន្តែ លោក​​​មិន​​​ចាំ​​​ឈ្មោះ​​​នោះ​​​ឡើយ​​​។ លោក​​​បាន​​​មាន​​​ប្រសាសន៍​​​ថា “វា​​​មាន​​​ការ​​​សង្ស័យ​​​ជា​​​ច្រើន​​​នៅ​​​ក្នុង​​​ករណី​​​នេះ​​​ ហើយ​​​ខ្ញុំ​​​បាន​​​ទាក់​​​ទង​​​មន្ត្រី​​​នគរ​​​បាល​​​កូរ៉េ​​​ហើយ​​​ ហើយ​​​ពួក​​​គេ​​​បាន​​​និយាយ​​​ថា ខ្លួន​​​នឹង​​​សហការ​​​ជាមួយ​​​ស្ថាន​​​ទូត​​​ដើម្បី​​​បញ្ជាក់​​​​​​ឲ្យ​​​បាន​​​ច្បាស់​​​អំពី​​​ករណី​​​នេះ​​​”៕ស៊ុយ​​​ឈាង​​​​​​​​​​​​​​​​​​​​​​​​​​​​​​​​​​​​  

លោក ទេព នីថា អគ្គលេខាធិការ​​​គណៈកម្មាធិការ​​​ជាតិ​​​រៀប​​​ចំ​​​ការ​​​បោះ​​​ឆ្នោត​​​ (គ.ជ.ប.)​​​បាន​​​ឲ្យ​​​ដឹង​​​កាល​​​ពីម្សិលមិញ​​​ថា លោក មាជ សុវណ្ណារ៉ា មន្ត្រី​​​របស់​​​គណបក្ស​​​សង្គ្រោះ​​​ជាតិ​​​ដែល​​​កំពុង​​​ជាប់​​​ពន្ធនាគារ​​​ អាច​​​ជា​​​សមាជិក​​​មួយ​​​រូប​​​ក្នុង​​​ចំណោម​​​សមាជិក​​​សភា​​​ចំនួន​​​៥៥​​​រូប​​​របស់​​​គណបក្ស​​​ប្រឆាំង​​​ ទោះ​​​បី​​​ជា​​​លោក​​​ត្រូវ​​​បាន​​​ចោទ​​​ប្រកាន់​​​ពី​​​បទ​​​ធ្វើ​​​កុបកម្ម​​​ក៏​​​ដោយ។ លោក សុវណ្ណារ៉ា ត្រូវ​​​បាន​​​ចាប់ខ្លួន​​​កា​​​លពី​​​ដើម​​​ខែ​​​នេះ​​​ក្រោម​​​ការ​​​ចោទ​​​​​​ប្រកាន់​​​របស់​​​​សាលា​​​ដំបូង​​​រាជ​​​ធានី​​​ភ្នំពេញ​​​ទាក់​​​ទិន​​​នឹង​​​ការ​​​តវ៉ា​​​ដែល​​​មាន​​​ការ​​​ប្រើ​​​អំពើ​​​ហិង្សា​​​​​​​​​​​​​​​កាល​​​ពី​​​ខែ​​​កក្កដា ដោយ​​​ធ្វើ​​​​​​ឲ្យ​​​សមាជិក​​​ និង​​​មន្ត្រី​​​របស់​​​គណបក្ស​​​សង្គ្រោះ​​​ជាតិ​​​ជាង​​​១០​​​នាក់​​​ត្រូវ​​​បាន​​​បញ្ជូន​​​ទៅ​​​ពន្ធនាគារ​​​ទាំងអស់​​​ ប៉ុន្តែ មាន​​​បី​​​នាក់​​​ត្រូវ​​​បាន​​​ដោះ​​​លែង​​​វិញ​​​ចាប់​​​តាំង​​​ពី​​​ពេល​​​នោះ​​​មក​​​។ លោក សម រង្ស៊ី មេដឹកនាំ​​​គណបក្ស​​​ប្រឆាំង​​​បាន​​​លើក​​​ឡើង​​​កាល​​​ពី​​​ថ្ងៃ​​​សុក្រ​​​ថា គណបក្ស​​​សង្គ្រោះ​​​​​ជាតិ​​​​​​នឹង​​​ស្នើ​​​ឲ្យ​​​ លោក យន់ ថារ៉ូ ដែល​​​ជា​​​បេក្ខភាព​​​តំណាង​​​រាស្ត្រ​​​លេខ​​​រៀង​​​ទី២​​​មណ្ឌល​​​បន្ទាយ​​​មាន​​​ជ័យ​​​បើក​​​ផ្លូវ​​​សម្រាប់​​​លោក​​​ សុវណ្ណារ៉ា ដែល​​​ជា​​​​​​បេក្ខភាព​​​តំណាង​​​រាស្ត្រ​​​លេខ​​​រៀង​​​ទី​​​៣​​​​​​មិន​​​ជាប់​​​ឆ្នោត​​​ អំឡុង​​​ការ​​​បោះឆ្នោត​​​កាល​​​ពី​​​ឆ្នាំ​​​មុន​​​។ លោក សម រង្ស៊ី បាន​​​លើក​​​ឡើង​​​ទៀត​​​ថា ការ​​​ដោះដូរ​​​នេះ​​​នឹង​​​ផ្តល់​​​អភ័យ​​​ឯកសិទ្ធិ​​​​​​តំណាង​​​រាស្ត្រ​​​ដល់​​​លោក​​​ សុវណ្ណារ៉ា ឲ្យ​​​រួច​​​ផុត​​​ពី​​​ការ​​​ផ្តន្ទា​​​ទោស ហើយ​​​បង្ខំ​​​ឲ្យ​​​តុលាការ​​​ចេញ​​​សេចក្តី​​​បង្គាប់​​​ដោះ​​​លែង​​​លោក​​​។ លោក ទេព​​​ នីថា បាន​​​លើក​​​ឡើង​​​ថា ការ​​​ដោះ​​​ដូរ​​​បែប​​​នេះ​​​សម្រាប់​​​លោក​​​ សុវណ្ណារ៉ា នឹង​​​អាច​​​ទៅ​​​រួច​​​ប្រសិន​​​បើ លោក ថារ៉ូ លា​​​លែង​​​ពី​​​តំណែង​​​។ ​​​លោក​​​បាន​​​មាន​​​ប្រសាសន៍​​​ថា “ច្បាប់​​​បោះ​​​ឆ្នោត​​​ចែង​​​ថា  ប្រសិន​​​បើ​​​សមាជិក​​​សភា​​​រូប​​​ណា​​​ស្លាប់​​​ លា​​​លែង​​​ពី​​​តំណែង​​​ ឬ​​​ក៏​​​បាត់​​​បង់​​​បេក្ខភាព​​​តំណាង​​​រាស្ត្រ​​​របស់​​​​​​ខ្លួន​​​ បេក្ខភាព​​​បន្ទាប់​​​ដែល​​​នៅ​​​ក្នុង​​​គណបក្ស​​​តែ​​​មួយ​​​គួរ​​​តែត្រូវ​​​បាន​​​ប្រកាស​​​ជ្រើស​​​រើស​​​ជា​​​សមាជិក​​​សភា​​​នៃ​​​គណបក្ស​​​ពាក់​​​ព័ន្ធ​​​”។ ប៉ុន្តែ លោក​​​ ទេព នីថា បាន​​​និយាយ​​​ថា លោក​​​មិន​​​អាច​​​ធ្វើ​​​អត្ថាធិប្បាយ​​​បាន​​​ឡើយ​​​ថា តើ​​​លោក សុវណ្ណារ៉ា នឹង​​​ត្រូវ​​​ដោះលែង​​​ពី​​​ពន្ធនាគារ​​​ដើម្បី​​​មក​​​ស្បថ​​​ចូល​​​កាន់​​​មុខ​​​តំណែង​​​​​​ជា​​​សមាជិក​​​សភា​​​ ឬ​​​យ៉ាង​​​ណា​​​នោះ​​​។ លោក​​​បាន​​​មាន​​​ប្រសាសន៍​​​ថា “ពាក់​​​ព័ន្ធនឹង​​​បញ្ហា​​​អភ័​​​យ​​​ឯកសិទ្ធិ​​​ វា​​​គ្មា​​​ន​​​អ្វី​​​ជាប់​​​ពាក់​​​ព័ន្ធ​​​នឹង​​​ គ.ជ.ប.​​​ទេ។​​​ ប៉ុន្តែ សម្រាប់​​​ករណី​​​របស់​​​លោក សុវណ្ណារ៉ា តុលាការ​​​នៅ​​​មិន​​​ទាន់​​​ចេញ​​​សេចក្តី​​​សម្រេច​​​ចុង​​​ក្រោយ​​​នៅ​​​ឡើយ​​​ទេ ហេតុ​​​ដូច្នេះ​​​ការ​​​ដោះ​​​ដូរ​​​អាច​​​ទៅ​​​រួច​​​”។ លោក ហែម សុជាតិ មេធាវី​​​របស​​​់លោក សុវណ្ណារ៉ា បាន​​​​​​លើក​​​ឡើង​​​ថា ប្រសិនបើ​​​ លោក សុវណ្ណារ៉ា ក្លាយ​​​ជា​​​មាជិក​​​សភា​​​ លោក​​​នឹង​​​ទទួល​​​បាន​​​អភ័យ​​​ឯកសិទ្ធិ​​​ភ្លាមៗ។លោក​​​បាន​​​មាន​​​ប្រសាសន៍​​​ថា “បន្ទាប់មក​​​តុលាការ​​​ត្រូវ​​​តែ​​​ដោះ​​​លែង​​​គាត់​​​ពី​​​ពន្ធនាគារ​​​ដោយ​​​ស្វ័យប្រវត្តិ ហើយ​​​តុលាការ​​​មិន​​​អាច​​​ឃុំ​​​ឃាំង​​​គាត់​​​នៅ​​​ក្នុង​​​ពន្ធនាគារ​​​បាន​​​ឡើយ”។ គេ​​​មិន​​​អាច​​​ទាក់​​​ទង​​​លោក ថារ៉ូ ដើម្បី​​​សុំ​​​ការ​​​ធ្វើ​​​អត្ថាធិប្បាយ​​​បាន​​​ឡើយ​​​។ លោក សម រង្ស៊ី បាន​​​លើក​​​ឡើង​​​ថា លោក​​​នៅ​​​មិន​​​ទាន់​​​ស្នើ​​​សុំ​​​ដោយ​​​ផ្ទាល់​​​ទៅ​​​លោក​​​ ថារ៉ូ ឲ្យ​​​លាលែង​​​ពី​​​តំណែង​​​នៅ​​​ឡើយ​​​ទេ។ លោក សម រង្ស៊ី បាន​​​មាន​​​ប្រសាសន៍​​​ថា “យើង​​​មិន​​​ចង់​​​ឲ្យគាត់​​​មាន​​​អារម្មណ៍​​​មិន​​​ល្អ​​​ឡើយ​​​ ព្រោះ​​​គាត់​​​ទើប​​​តែ​​​មាន​​​ជំងឺ​​​ដាច់​​​សរសៃ​​​ឈាម​​​ក្នុង​​​ខួរ​​​ក្បាល ហើយ​​​គាត់​​​មាន​​​សុខភាពមិន​​​ល្អ​​​នោះ​​​ទេ​​​”៕ស៊ុយឈាង (រាយការណ៍​​​បន្ថែម​​​ដោយ​​​ Alex Willemyns)​​​​​​​​​​​​​​​    

The Cambodia Daily | All the News Without Fear or Favor | The Daily Newspaper of Record Since 1993