លោក ហ៊ុន សែន ៖ បក្ស​​​សង្គ្រោះ​​​​​​​​​ជាតិ​​​នឹង​​​បាត់​​​បង់​​​អាសនៈ​​សភា​​​​ ​​​ប្រសិន​​​បក្ស​​​នេះ​​​ហ៊ាន​​​ធ្វើ​​​ពហិការ​​​​​​

​​​លោក​​​ វ៉ូលហ្គាំង​​​ ម៉ូស័រ (Wolfgang Moser) ឯកអគ្គ​​​រដ្ឋ​​​ទូត​​​អាល្លឺម៉ង់​​​ បាន​​​ឲ្យ​​​ដឹង​​​កាល​​​ពី​​​ថ្ងៃម្សិលមិញ​​​ថា  លោក​​​នាយក​​​រដ្ឋ​​​មន្ត្រី ហ៊ុន សែន បាន​​​ព្រមាន​​​​​​ថា ខ្លួន​​​នឹង​​​ប្រគល់​​​អាសនៈ​​​សភា​​​របស់​​​គណបក្ស​​​សង្គ្រោះ​​​ជាតិ​​​ឲ្យ​​​គណ​​​បក្ស​​​តូច​​​ៗ​​​ ប្រសិន​​​បើ​​​​​​គណបក្ស​​​ប្រឆាំង​​​នេះ​​​​​​បដិសេធ​​​មិន​​​ទទួល​​​យក​​​អាសនៈ​​​របស់​​​ខ្លួន​​​នៅ​​​រដ្ឋ​​​សភា​​​ទេ​​​នោះ​​​។

លោក ម៉ូស័រ បាន​​​ឲ្យ​​​ដឹង​​​ថា លោក ហ៊ុន សែន បាន​​​ស្នើ​​​ឲ្យ​​​លោក​​​ផ្ញើសារ​​​នេះ​​​បន្ត​​​​​​ទៅ​​​គណបក្ស​​​សង្គ្រោះ​​​ជាតិ​​​ អំឡុង​​​កិច្ច​​​ប្រជុំ​​​មិន​​​បើក​​​ចំហ​​​មួយ​​​នៅ​​​ការិយាល័យ​​​លោក​​​​​​នាយក​​​រដ្ឋ​​​មន្ត្រី​​​រូប​​​នេះ​​​ កាល​​​ពី​​​ព្រឹក​​​ម្សិលមិញ ​​។ លោក ម៉ូស័រ បាន​​​ឲ្យ​​​ដឹង​​​បន្ត​​​ថា នាយក​​​រដ្ឋ​​​មន្ត្រី​​​រូប​​​នេះ​​​បាន​​​លើក​​​ឡើង​​​អំពី​​​លទ្ធភាព​​​នៃ​​​ការ​​​បែង​​​ចែក​​​អាសនៈ​​​របស់​​​គណបក្ស​​​សង្គ្រោះ​​​ជាតិ​​​ឲ្យ​​​គណបក្ស​​​នយោបាយ​​​តូច​​​ៗ​​​ផ្សេងៗ​​​​​​ទៀត​​​ដែល​​​សុទ្ធ​​​តែ​​​គ្មាន​​​អាសនៈ​​​សភា​​​ក្នុង​​​ករណី​​​គណបក្ស​​​សង្គ្រោះ​​​ជាតិ​​​​​​ធ្វើ​​​ពហិកា​​​មិន​​​ចូល​​​រួម​​​ក្នុង​​​សម័យ​​​ប្រជុំ​​​សភា​​​​​​។

អ្នក​​​ធ្វើ​​​អត្ថាធិប្បាយ​​​នយោបាយ​​​នានា​​​បាន​​​ធ្វើ​​​ការ​​​កត់​​​សម្គាល់​​​ថា អាសនៈ​​​សភា​​​ចំនួន​​​៥៥​​​របស់​​​គណបក្ស​​​សង្គ្រោះ​​​ជាតិ​​​អាច​​​រារាំង​​​គណ​​​បក្ស​​​ប្រជា​​​ជន​​​កម្ពុជា​​​ដែល​​​មាន​​​៦៨​​​អាសនៈ​​​ពី​​​ការ​​​បង្គ្រប់​​​នូវ​​​កូរ៉ុម​​​​​​​​​​​​ចាំ​​​បាច់​​​សម្រាប់​​​ការ​​​បើក​​​សម័យ​​​ប្រជុំ​​​សភា​​​លើក​​​ដំបូង​​​ស្ដី​​​ពី​​​ការ​​​បង្កើត​​​រាជ​​​រដ្ឋាភិបាល​​​ក្រោយ​​​​​​ពេល​​​លទ្ធផល​​​នៃ​​​កា​​​រ​​​បោះ​​​ឆ្នោត​​​​​​ត្រូវ​​​បាន​​​ប្រកាស​​​ជា​​​ផ្លូវ​​​ការ​​​រួច​​​​​​។

លោក ម៉ូស័រ បាន​​​និយាយ​​​ពី​​​ជំនួប​​​ជាមួយ​​​នឹង​​​លោក​​​នាយក​​​រដ្ឋ​​​មន្ត្រី​​​ ហ៊ុន សែន ថា “ គាត់​​​បាន​​​ដាក់​​​ចេញ​​​សេនារីយោចំនួន​​​ពីរ​​​​​​​​​។ ទី១​​​គឺ​​​​​​គាត់​​​ផ្ដល់​​​កិច្ច​​​សហប្រតិបត្តិការ​​​ជិត​​​ស្និទ្ធ​​​ជាង​​​នៅ​​​រដ្ឋ​​​សភា​​​ [អាណត្តិ​​​មុន​​​]…  គាត់​​​បាន​​​និយាយ​​​ថា គាត់​​​ព្រម​​​ធ្វើ​​​កិច្ច​​​សហ​​​ប្រតិបត្តិការ​​​ ប៉ុន្តែ​​​បាន​​​ច្រាន​​​ចោល​​​លទ្ធភាព​​​នៃ​​​ការ​​​បង្កើត​​​ដៃ​​​គូ​​​ចម្រុះ​​​” ជាមួយ​​​គណបក្ស​​​សង្គ្រោះ​​​ជាតិ​​​។ លោក ម៉ូស័រ បាន​​​បន្ត​​​ថា សេនារីយោ​​​ទី២​​​គឺ​​​មិន​​​ល្អ​​​សម្រាប់​​​គណបក្ស​​​សង្គ្រោះ​​​ជាតិ​​​ទេ​​​។

ឯកអគ្គ​​​រដ្ឋ​​​ទូត​​​រូប​​​នេះ​​​បាន​​​មាន​​​ប្រសាសន៍​​​ថា “ គាត់​​​ [លោក ហ៊ុន សែន] បាន​​​និយា​​​យ​​​ថា រដ្ឋ​​​ធម្មនុញ្ញ​​​​​មាន​​​មាត្រា​​​មួយ​​​ … ប្រសិន​​​បើ​​​សមាជិក​​​សភា​​​មិន​​​ទទួល​​​យក​​​អាសនៈ​​​របស់​​​ខ្លួន​​​តាម​​​ពេល​​​កំណត់​​​ទេ​​​នោះ​​​  មាន​​​មាត្រា​​​មួយ​​​ដែល​​​អនុញ្ញាត​​​ឲ្យ​​​គាត់​​​បែង​​​ចែក​​​អាសនៈ​​​ឲ្យ​​​គណបក្ស​​​ផ្សេង​​​ទៀត​​​​​​”។

លោក ម៉ូស័រ បាន​​​បន្ថែម​​​ថា “ តាម​​​ការ​​​យល់​​​ដឹង​​​របស់​​​ខ្ញុំ​​​ គ.ជ.ប. [គណៈកម្មាធិការ​​​ជាតិ​​​រៀប​​​ចំ​​​ការ​​​បោះ​​​ឆ្នោត​​​] ទើប​​​អាច​​​ធ្វើ​​​ដូច្នោះ​​​​​​បាន​​​។ គាត់​​​មិន​​​បាននិយាយ​​​ថា ខ្លួន​​​គាត់​​​ផ្ទាល់​​​នឹង​​​ធ្វើ​​​ដូច្នោះឡើយ​​​​​​។ ប៉ុន្តែ​​​គាត់ [លោក ហ៊ុន សែន] បាន​​​បញ្ជាក់​​​ច្បាស់​​​ណាស់​​​ថា គាត់​​​ទន្ទឹង​​​រង់​​​ចាំ​​​ការ​​​ធ្វើ​​​កិច្ច​​​សហ​​​ប្រតិបត្តិការ​​​” ជាមួយ​​​គណបក្ស​​​ប្រឆាំង​​​នេះ។

ពាក់​​​ព័ន្ធ​​​នឹង​​​សេនារីយោ​​​ទី​​​១ លោក ម៉ូស័រ​​​ បាន​​​ឲ្យ​​​ដឹង​​​ថា លោក​​​នាយក​​​រដ្ឋ​​​មន្ត្រី​​​មិន​​​បាន​​​បរិយាយ​​​ថា តើ​​​កិច្ច​​​សហ​​​ប្រតិបត្តិការ​​​ជាមួយ​​​គណបក្ស​​​ប្រឆាំង​​​នឹង​​​មាន​​​លក្ខណៈបែប​​​ណា​​​ឡើយ​​​ ប៉ុន្តែ​​​លោក​​​យល់​​​ថា លោក ហ៊ុន សែន ប្រហែល​​​ជា​​​ចង់​​​សំដៅ​​​ទៅ​​​លើ​​​មុខ​​​តំណែង​​សំខាន់​​​ៗ​​​​​​​​​សម្រាប់​​​គណបក្ស​​​សង្គ្រោះ​​​ជាតិ​​​ក្នុង​​​គណៈកម្មការ​​​មួយ​​​ចំនួន​​​​​​ក្នុង​​​ចំណោម​​​គណៈ​​​កម្មការ​​​​​​របស់​​​សភា​​​។

ឯកអគ្គ​​​រដ្ឋ​​​ទូត​​​រូប​​​នេះ​​​បាន​​​បន្ត​​​​​​ថា ក្រៅ​​​ពី​​​​​​នេះ​​​​​​​​​​​​ លោក ហ៊ុន សែន “ បាន​​​និយាយថា រដ្ឋា​​​ភិបាល​​​នឹង​​​ត្រៀម​​​ខ្លួន​​​បាន​​​ប្រសើ​​​រ​ជាង​​​សព្វ​​​ដង​​​​​​ក្នុង​​​ការ​​​ឆ្លើយ​​​តប​​​ទៅ​​​នឹង​​​ការ​​​ចោទ​​​សួរ​​​នៅ​​​រដ្ឋ​​​សភាជាតិ​​​​​​​​​”។ លោក​​​ ម៉ូស័រ បាន​​​លើក​​​ឡើង​​​ថា លោក​​​មិន​​​ធ្វើ​​​អត្ថាធិប្បាយ​​​អំពី​​​លទ្ធភាព​​​នៃ​​​ការ​​​បែង​​​ចែក​​​អាសនៈ​​​សភា​​​របស់​​​គណបក្ស​​​ប្រឆាំង​​​ឲ្យ​​​គណបក្ស​​​ផ្សេង​​​ៗ​​​ទៀត​​​ដោយ​​​បង្ខំ​​​ទេ​​​ ព្រោះ​​​លទ្ធផល​​​ផ្លូវ​ការ​​​នៃ​​​ការ​​​បោះ​​​ឆ្នោត​​​នៅ​​​មិន​​​ទាន់​​​បាន​​​ចេញ​​​ផ្សាយ​​​នៅ​​​ឡើយ​​​។

លោក ម៉ូស័រ ក៏​​​បាន​​​លើក​​​ឡើង​​​ផង​​​ដែរ​​​ថា គេ​​​មិន​​​ទាន់​​​អាច​​​​​​និយាយ​​បាន​​​ថា តើ​​​ការ​​​បោះ​​​ឆ្នោត​​​នេះ​​​​​​មាន​​​លក្ខណៈ​​​សេរី​​​ និង​​​យុត្តិធម៌​​​ឬ​​​នៅ​​​ទេ​​​ ប៉ុន្តែ​​​លោក​​​​​​មាន “ សង្ឃឹម​​​ខ្លះ” លើ​​​គណៈកម្មាធិការ​​​ស៊ើប​​​អង្កេត​​​ដែល​​​គណបក្ស​​​ប្រឆាំង​​​​​​កំពុង​​​អំពាវ​​​នាវ​​​ឲ្យ​​​បង្កើត​​​ឡើង​​​ដើម្បី​​​ស៊ើប​​​អង្កេត​​​ពី​​​សេចក្ដី​​​រាយការណ៍​​​ពី​​​ភាព​​​មិន​​​ប្រក្រតី​​​​​​នៅ​​​ថ្ងៃ​​​បោះ​​​ឆ្នោត​​​។

ឯកអគ្គ​​​រដ្ឋ​​​ទូត​​​រូប​​​នេះ​​​ ក៏​​​បាន​​​ឲ្យ​​​ដឹង​​​ផង​​​ដែរ​​​ថា លោក​​​នាយក​​​រដ្ឋ​​​មន្ត្រី​​​ ហ៊ុន សែន បាន​​​ស្វាគមន៍​​​ឱកាស​​​នៃ​​​ការ​​​ស៊ើប​​​អង្កេត​​​ពី​​​ភាព​​​មិន​​​ប្រក្រតី​​​ក្នុង​​​ការ​​​បោះ​​​ឆ្នោត​​​អំឡុង​​​ជំនួប​​​មិន​​​បើក​​​ចំហ​​​នេះ។ ប៉ុន្តែ កាល​​​ពី​​​ម្សិលមិញ​​​ គ.ជ.ប. បាន​​​ច្រាន​​​ចោល​​​​​​តួនាទី​​​ដោយ​​​ផ្ទាល់​​​ណាមួយ​​​របស់​​​គណ​​​បក្ស​​​នយោបាយ​​​ ឬ​​​អង្គការ​​​ក្រៅ​​​រដ្ឋាភិបាល​​​ក្នុង​​​ការ​​​ស៊ើប​​​អង្កេត​​​ពី​​​ភាព​​​មិន​​​ប្រក្រតី​​​ក្នុង​​​ការ​​​បោះ​​​ឆ្នោត​​ ខណៈ​​​ប្រព័ន្ធ​​​ផ្សព្វ​​​ផ្សាយ​​​រដ្ឋ​​​បាន​​​ចេញ​​​ផ្សាយ​​​សេចក្ដី​​​កែ​​​តម្រូវ​​​​​​ដោយ​​​បញ្ជាក់​​​ថា  លោក ហ៊ុន សែន មិន​​​បាន​​​ស្វាគមន៍​​​ការ​​​ចូល​​​រួម​​​ “​​​ ជា​​​អន្តរជាតិ” ក្នុង​​​គណៈកម្មាធិការ​​​ស៊ើប​​​អង្កេត​​​ឯករាជ្យ​​​ ដែ​​​ល​​​គណបក្ស​​​សង្គ្រោះ​​​ជាតិ​​​បាន​​​អំពាវ​​​នាវ​​​ឲ្យ​​​បង្កើត​​​ឡើង​​​នោះទេ​​​។

លោក យឹម សុវណ្ណ អ្នក​​​នាំពាក្យ​​​គណបក្ស​​​សង្គ្រោះ​​​ជាតិ បាន​​​ហៅ​​​ការ​​​ព្រមាន​​​របស់​​​លោក ហ៊ុន សែន អំពី​​​ការ​​​បែង​​​ចែក​​​អាសនៈ​​​របស់​​​គណបក្ស​​​នេះ​​​ឲ្យ​​​គណបក្ស​​​ផ្សេង​​​ថា ជា​​​ទង្វើ​​​មិន​​​ស្រប​​​ច្បាប់​​​ និង​​​ “ ហួស​​​សម័យ​​​”។ លោក យឹម សុវណ្ណ បាន​​​ថ្លែង​​​ថា “ សូម​​​ឲ្យ​​​គាត់​​​សាក​​​មើល​​​ទៅ​​​។ ខ្ញុំ​​​ចង់​​​ឲ្យ​​​គាត់​​​សាក​​​មើល​​​ ហើយ​​​អ្នក​​​អាច​​​សួរ​​​អ្នក​​​បោះ​​​ឆ្នោត​​​ចំនួន​​​បី​​​លាន​​​នាក់​​​ទៅ​​​មើល​​​ថា តើ​​​នឹង​​​មាន​​​​​​អ្វីកើត​​​ឡើង​​ បើ​​​​​​គាត់​​​ព្យាយាម​​​បែង​​​ចែក​​​អាសនៈ​​​​​​សភា​​​របស់​​​គណ​​​បក្ស​​​សង្គ្រោះ​​​ជាតិ​​​ឲ្យ​​​គណ​​​បក្ស​​​ផ្សេង​​​នោះ​​​។ តើ​​​អ្នក​​​បោះ​​​ឆ្នោត​​​ព្រម​​​ឬអត់​​​ ហើយ​​​ចុះ​​​យុវជន​​​រាប់​​​លាន​​​នាក់​​​យល់​​​ព្រម​​​ឬអត់​​​?”។

លោក យឹម សុវណ្ណ ក៏​​​បាន​​​ច្រាន​​​ចោល​​​ការ​​​អះអាង​​​របស់​​​លោក ហ៊ុន សែន ដែល​​​ថា គណបក្ស​​​សង្គ្រោះ​​​ជាតិ​​​អាច​​​បង្កើត​​​រដ្ឋាភិបាល​​​ថ្មី​​​​​​ដោយ​​​គ្មាន​​​វត្ត​​​មាន​​​របស់​​​គណបក្ស​​​ប្រឆាំង​​​ ហើយ​​​បាន​​​បញ្ជាក់​​​ថា តំណាង​​​រាស្ត្រ​​​​​​យ៉ាង​​​តិច​​​​​​​​​១២០​​​រូប​​​ត្រូវ​​​បង្ហាញ​​​ខ្លួន​​​​​​អំឡុង​​​សម័យ​​​ប្រជុំ​​​លើក​​​ដំបូង​​​របស់​​​សភា​​​ ដើម្បី​​​ឲ្យ​​​រដ្ឋាភិបាល​​​ថ្មី​​​មាន​​​លក្ខណៈ​​​ស្រប​​​ច្បាប់​​​។

គួរ​​​បញ្ជាក់​​​ថា រដ្ឋធម្មនុញ្ញ​​​ចែង​​​ថា រដ្ឋ​​​សភា​​​  “ ត្រូវ​​​មាន​​​សមាជិក​​​យ៉ាង​​​តិច​​​១២០​​​រូប​​​”។ ប៉ុន្តែ​​​ រដ្ឋ​​​ធម្មនុញ្ញ​​​ក៏​​​បាន​​​ចែង​​​ផង​​​ដែរ​​​ថា​​​ រដ្ឋ​​​សភា​​​នីតិកាល​​​ថ្មី​​​នីមួយ​​​ៗ​​​​​​ត្រូវ​​​តែ​​​ជ្រើស​​​រើស​​​ថ្នាក់​​​ដឹក​​​នាំ​​​របស់​​​ខ្លួន​​​ដោយ​​​សំឡេង​ភាគ​​​ច្រើន​​​ដាច់ខាត​​​ ឬ​​​៥០​​​បូក​​​១​​​។

ទោះ​​​ជា​​​យ៉ាង​​​ណា​​​ រដ្ឋ​​​ធម្មនុញ្ញ​​​ហាក់​​​ដូច​​​ជា​​​ពុំ​​​មាន​​​មាត្រ​​​ណាមួយ ​​​ដែល​​​ចែង​​​ពី​​​ការ​​​ជំនួស​​​សមាជិក​​​រដ្ឋ​​​សភា​​​​​​ដែល​​​បដិសេធ​​​មិន​​​ទទួល​​​យក​​​អាសនៈ​​​របស់​​​ខ្លួន​​​ទេ​​​។ ទោះ​​​ជា​​​​​​ដូច្នេះ​​​ក្តី​​​​​​ ច្បាប់​​​ស្ដី​​​ពី​​​ការ​​​បោះ​​​ឆ្នោត​​​​​​ជ្រើស​​​តាំង​​​តំណាង​​​រាស្ត្រ​​​ចែង​​​ថា គ.ជ.ប. អាច​​​បែង​​​ចែក​​​អាសនៈ​​​របស់​​​គណបក្ស​​​ជាប់​​​ឆ្នោត​​​​​​ឲ្យ​​​គណបក្ស​​​ផ្សេង​​​បាន​​​ ប៉ុន្តែ​​​​​​ បាន​​​តែ​​​ក្នុង​​​ករណី​​​ដែល​​​​​​គណបក្ស​​​ជាប់​​​ឆ្នោត​​​នោះ​​​ “ ប្រកាស​​​បោះ​​​បង់​​​ចោល​​​” អាសនៈ​​​របស់​​​ខ្លួន​​​ ឬ​​​ប្រសិន​​​បើ​​​គណបក្ស​​​នោះ​​​ត្រូវ​​​បាន​​​លប់​​​ឈ្មោះ​​​ចេញ​​​ពី​​​បញ្ជី​​​គណបក្ស​​​នយោបាយ​​​ដែល​​​មាន​​​ការ​​​ទទួល​​​ស្គាល់​​​។

លោក គល់ បញ្ញា នាយក​​​ប្រតិបត្តិ​​​​​​គណៈ​​​កម្មាធិការ​​​ដើម្បី​​​ការ​​​បោះ​​​ឆ្នោត​​​ដោយ​​​សេរី និង​​​យុត្តិធម៌​​​នៅកម្ពុជា ហៅ​​​កាត់​​​ថា ខុមហ្វ្រែល​​​​​​ បាន​​​លើក​​​ឡើង​​​ថា មាត្រា​​​នៅ​​​ក្នុង​​​ច្បាប់​​​ស្ដី​​​ពី​​​រដ្ឋ​​​សភា​​​ជាតិ​​​នេះ​​​​​​មិន​​​អាច​​​យក​​​​​មក​​​ប្រើ​​​ដើម្បី​​​ដក​​​ហូត​​​មុខ​​​តំណែង​​​ជា​​​តំណាង​​​រាស្ត្រ​​​របស់​​​គណ​​​បក្ស​​​សង្គ្រោះ​​​ជាតិ​​​បាន​​​ទេ​​​។

លោក​​​ គល់ បញ្ញា បាន​​​មាន​​​ប្រសាសន៍​​​ថា   “ អ្នក​​​មិន​​​អាចធ្វើ​​​ការ​​​​​​សន្មតដោយ​​​ស្វ័យ​​​ប្រវត្តិ​​​ថា ពួក​​​គេ​​​បាន​​​បោះ​​​បង់​​​ចោល​​​ [អាសនៈ​​​សភា​​​របស់​​​ខ្លួន​​​]” ប្រសិន​​​បើ​​​ពួក​​​គេ​​​បដិសេធ​​​មិន​​​ទទួល​​​យក​​​ទេ​​​។ លោក បញ្ញា ក៏​​​បាន​​​សម្ដែង​​​ការ​​​យល់​​​ស្រប​​​ជាមួយ​​​លោក យឹម សុវណ្ណ​​ ថា រដ្ឋ​​​សភា​​​ជាតិ​​​តម្រូវ​​​ឲ្យ​​​​មាន​​​​តំណាង​​​រាស្ត្រ​​​យ៉ាងតិច​​​​​​១២០​​​រូប​​​អំឡុង​​​សម័យ​​​ប្រជុំ​​​សភា​​​​​​​​​លើក​​​ដំបូង​​​របស់​​​ខ្លួន​​​ដើម្បី​​​បង្កើត​​​រដ្ឋាភិបាល​​​ថ្មី​​​។

លោក កែវ ផល្លា ជា​​​ប្រធាន​​​នាយក​​​ដ្ឋាន​​​សេវា​​​កម្ម​​​ច្បាប់​​​នៅ​​​គ.ជ.ប. បាន​​​បដិសេធ​​​មិន​​​ធ្វើ​​​អត្ថាធិប្បាយ​​​អំពីកា​​​រ​​​ព្រមាន​​​របស់​​​លោក ហ៊ុន សែន តាម​​​រយៈ​​​ឯកអគ្គ​​​រដ្ឋ​​​ទូត​​​អាល្លឺម៉ង់​​​ឡើយ​​​។ លោក​​​បាន​​​ថ្លែង​​​ថា “ ខ្ញុំ​​​មិន​​​ដឹង​​​ទេ​​​។ ខ្ញុំ​​​មិន​​​អាច​​​ធ្វើ​​​អត្ថាធិប្បាយ​​​បាន​​​ឡើយ​​​”។

ឯកអគ្គ​​​រដ្ឋ​​​ទូត​​​អាល្លឺម៉ង់​​​ វ៉ូលហ្គាំង ម៉ូស័រ ក៏​​​បាន​​​ឲ្យ​​​ដឹង​​​ផង​​​ដែរ​​​ថា លោក ហ៊ុន សែន បាន​​​ចោទ​​​ប្រកាន់​​​សហ​​​ភាព​​​អឺរ៉ុប​​​កាល​​​ពី​​​ម្សិលមិញ​​​​​​ថា និយាយ​​​ផ្សេង​​​ធ្វើ​​​ផ្សឹង​​​ចំពោះ​​​ការ​​​រិះ​​​គន់​​​ជា​​​រឿយៗ​​​អំពី​​​ការ​​​រំលោភ​​​បំពាន​​​សិទ្ធិ​​​មនុស្ស​​​ពី​​​សំណាក់​​​រដ្ឋាភិបាល​​​ ប៉ុន្តែ​​​ក្នុង​​​ពេល​​​ជាមួយ​​​គ្នា​​​នោះ​​​ បែរជា​​​ធ្វើ​​​គ​​​ធ្វើ​​​ថ្លង់​​​​​​ពេល​​​លោក​​​​​​ សម រង្ស៊ី ប្រើ​​​ភាសា​​​រើស​​​អើង​​​ជាតិ​​​សាសន៍​​​ជាមួយ​​​វៀតណាម​​​អំឡុង​​​យុទ្ធនាការ​​​ឃោសនា​​​រក​​​សំឡេង​​​ឆ្នោត​​​។ លោក ម៉ូស័រ បាន​​​ឲ្យ​​​ដឹង​​​ថា សហ​​​ភាព​​​អឺរ៉ុប​​​កំពុង​​​ពិចារណា​​​ពី​​​ការ​​​ឆ្លើយ​​​តប​​​ចំពោះ​​​ការ​​​ប្រើ​​​ភាសា​​​រើស​​​អើង​​​របស់​​​លោក សម រង្ស៊ី នេះ​​​។

កាល​​​ពី​​​ម្សិលមិញ លោក អ៊ាង សុផាល្លែត ជំនួយ​​​ការ​​​ផ្ទាល់​​​របស់​​​លោក ហ៊ុន សែន បាន​​​ផ្ដល់​​​ព័ត៌មាន​​​​​​ដូច​​​គ្នា​​​អំពី​​​ជំនួប​​​​​រវាង​​​លោក ហ៊ុន សែន និង​​​លោក ម៉ូស័រ ហើយ​​​ថា លោក​​​នាយ​​​ក​​​រដ្ឋ​​​មន្ត្រី​​​បាន​​​ផ្ញើ​​​សារ​​​ព្រមាន​​​ដូច​​​គ្នា​​​នេះ​​​តាម​​​រយៈ​​​ឯកអគ្គ​​​រដ្ឋ​​​ទូ​​ត​​​ចិន​​​​​​ ពូ ជាំងគ័រ (Bu Jianguo) នៅព្រឹក​​​ថ្ងៃ​​​ដដែល​​​នោះ​​​។

លោក សុផាល្លែត បាន​​​មាន​​​ប្រសាសន៍​​​ថា “ ក្នុង​​​ករណី​​​ពួក​​​គេ​​​ [ គណបក្ស​​​សង្គ្រោះ​​​ជាតិ​​​] ធ្វើ​​​ពហិកា​​​ ឬ​​​បោះ​​​បង់​​​អាសនៈ​​​របស់​​​ខ្លួន​​​នោះ​​​ វា​​​អាច​​​ត្រូវ​​​បាន​​​ដក​​​យក​​​ និង​​​បែង​​​ចែក​​​ក្នុង​​​ចំណោម​​​គណបក្ស​​​ផ្សេង​​​ៗ​​​ទៀត​​​ ហើយ​​​ពួក​​​គេ​​​នឹង​​​ស្បថ​​​ចូល​​​កាន់​​​តំណែង​​​។ បន្ទាប់​​​ពី​​​សមាជិក​​​សភា​​​ថ្មី​​​ត្រូវ​​​បាន​​​ប្រកាស​​​ឈ្មោះ​​​ និង​​​ស្បថ​​​ចូល​​​កាន់​​​តំណែង​​​ហើយ​​​នោះ ​​​គេ​​​នឹង​​​បង្កើត​​​​​​​​​រដ្ឋាភិបាល​​​”។

លោក​​​បានបន្ត​​​ថា លោក ហ៊ុន សែន ក៏​​​បាន​​​ច្រាន​​​ចោល​​​ការ​​​បក​​​ស្រាយ​​​រដ្ឋ​​​ធម្មនុញ្ញ​​​ដែល​​​ថា រដ្ឋ​​​សភា​​​ជាតិ​​​តម្រូវ​​​ឲ្យ​​​មាន​​​​​​តំណាង​​​រាស្ត្រ​​​​​​លើស​​​ពី​​​ចំនួន​​​ភាគ​​​ច្រើន​​​ដាច់​​​ខាត​​​ ដើម្បី​​​ចាប់​​​ផ្ដើម​​​សម័យ​​​ប្រជុំ​​​លើក​​​ដំបូង​​​របស់​​​ខ្លួន​​​ក្រោយ​​​ការ​​​បោះ​​​ឆ្នោត​​​។

លោក សុផាល្លែត ក៏​​​បាន​​​ឲ្យ​​​ដឹង​​​ផង​​​ដែរ​​​ថា លោក ហ៊ុន សែន បាន​​​ច្រាន​​​ចោល​​​លទ្ធភាព​​​នៃ​​​ការ​​​បង្កើត​​​រដ្ឋាភិបាល​​​ចម្រុះ​​​ជាមួយ​​​​​​គណ​​​បក្ស​​​សង្គ្រោះ​​​ជាតិ​​​។ លោក​​​បាន​​​ថ្លែង​​​ថា “ សម្ដេច [លោក ហ៊ុន សែន] បាន​​​ផ្ញើសារ​​​ទៅ​​​សហ​​​ភាព​​​អឺរ៉ុប​​​ និង​​​គណបក្ស​​ប្រឆាំង​​​រួច​​​ហើយ​​​ថា វា​​​មិន​​​អាច​​​ទៅ​​​រួច​​​ទេ​​​ ព្រោះ​​​វា​​​ផ្ទុយ​​​ពី​​​គោល​​​ការណ៍​​​ប្រជា​​​ធិប​​​តេយ្យ​​​ ដែល​​​តម្រូវ​​​ឲ្យ​​​មាន​​​រដ្ឋាភិបាលមួយ​​​​​​ និង​​​គណបក្ស​​​ប្រឆាំង​​​មួយ​​​”។

ប៉ុន្តែ ក្រោយសន្និសីទ​​​កាសែត​​​ដំបូង​​​របស់​​​លោក​​​ ក្រុម​​​អ្នក​​​យក​​​ព័ត៌មាន​​​ត្រូវ​​​លោក​​​ហៅ​​​ឲ្យ​​​មក​​​ការិយាល័យ​​​នាយក​​​រដ្ឋ​​​មន្ត្រី​​​វិញ​​​រយៈ​​​ពេល​​​ប្រហែល​​​មួយ​​​ម៉ោង​​​ក្រោយ​​​មក​​​ដើម្បី​​​ប្រាប់​​​ថា សន្និសីទ​​​កាសែត​​​ដំបូង​​​របស់​​​លោក​​​ គឺ​​​មិន​​​ត្រឹម​​​ត្រូវ​​​ទេ​​​។

ក្នុង​​​សន្និសីទ​​​កាសែត​​​លើក​​​ទី២ លោក សុផាល្លែត​​​ បាន​​​ចៀស​​​វាង​​​មិន​​​និយាយអំ​​​​​​ពី​​​ចំណុច​​​ភាគ​​​ច្រើន​​​ ដែល​​​លោក​​​បាន​​​លើក​​​ឡើង​​​​​ពី​​​ដំបូង​​​ ដែល​​​បាន​​​និយាយ​​​ដូច្នេះ​​​វិញ​​​ថា ទាំង​​​ឯកអគ្គ​​​រដ្ឋ​​​ទូត​​​ចិន និង​​​ឯកអគ្គ​​​រដ្ឋ​​​ទូត​​​អាល្លឺម៉ង់​​​ បាន​​​អប​​​អរ​​​សាទរ​​​លោក ហ៊ុន សែន ចំពោះ​​​ការ​​​ទទួល​​​បាន​​​ជ័យ​​​ជម្នះ​​​ក្នុង​​​ការ​​​បោះ​​​ឆ្នោត​​​។

លោក​​​បាន​​​មាន​​​ប្រសាសន៍​​​ថា “ ឯកឧត្ដម​​​ វ៉ូលហ្គាំង ក៏​​​បាន​​​អប​​​អរ​​​សាទរ​​​សម្ដេ​​ច​​​ចំពោះ​​​ជ័យ​​​ជម្នះ​​​ក្នុង​​​ការ​​​បោះ​​​ឆ្នោត​​​ ផងដែរ ហើយ​​​បាន​​​និយាយ​​​ថា អធិការបតី​​​របស់​​​គាត់​​​ គឺ​​​លោក​​​ស្រី​​​ អ៊ែន​​​ជីឡា មើគែល ប្រាកដ​​​ជានឹង​​​​​​មាន​​​​​​ក្ដី សោមន​​​ស្ស​​​រីក​​​រាយ​​​ខ្លាំង​​​ណាស់​​​ ប្រសិន​​​បើ​​​គាត់​​​បាន​​​ឈ្នះ​​​​​អាសនៈ​​​ភាគ​​​ច្រើន​​​​​​ដូច​​​គណ​​​បក្ស​​​ប្រជា​​​ជន​​​កម្ពុជា​​​នោះ​​​”។ លោក ម៉ូស័រ បាន​​​បញ្ជាក់​​​នៅពេល​​​ក្រោយ​​​មក​​​ថា លោក​​​ពិត​​​ជា​​​បាន​​​អប​​​អរ​​​សាទរ​​​លោក​​​នាយក​​​រដ្ឋ​​​មន្ត្រី​​​​​​ចំពោះ​​​ជ័យ​​​ជម្នះ​​​ដោយ​​​ “ ផ្អែក​​​លើ​​​លទ្ធផល​​​បឋម​​​” មែន​​​៕

ប្រែ​​​សម្រួល​​​ដោយ ភួន ច័ន្ទសេរីវុធ

ព័ត៌មាន​ថ្មីៗ

លោក ខៀវ កាញារីទ្ធ រដ្ឋ​​​មន្រ្តី​​​ក្រសួង​​​ព័ត៌​​​មាន​​​បាន​​​ឲ្យ​​​ដឹង​​​កាល​​​ពីម្សិលមិញ​​​ថា គណបក្ស​​​សង្គ្រោះ​​​ជាតិ​​​នឹង​​​ទទួល​​​បាន​​​តែ​​​អាជ្ញាប័ណ្ណ​​​សម្រាប់​​​បើក​​​ស្ថានីយ​​​ទូរទស្សន៍​​​ប្រើប្រព័ន្ធ​​​ឌីជីថល​​​ (Digital) ប៉ុណ្ណោះដោយ​​​យោង​​​តាម​​​កិច្ច​​​ព្រម​​​ព្រៀង​​​កាល​​​ពី​​​ថ្ងៃ​​​ទី​​​២២ ខែ​​​កក្កដា ព្រោះ​​​​​​ថា សព្វ​​​ថ្ងៃ​​​គ្មាន​​​ហ្វ្រេកង់​​​ទំនេរ​​​សម្រាប់​​​បើក​​​ស្ថានីយ​​​ទូរទស្សន៍​​​អាណាឡូក (Analog)​​ ឡើយ។ នៅ​​​ក្នុង​​​កិច្ច​​​សម្ភាស​​​តាម​​​វិទ្យុ​​​មួយ​​​កាល​​​ពី​​​យប់​​​​​​ថ្ងៃ​​​ពុធ​​​​​​​​​​​​ លោក សម រង្ស៊ី ប្រធាន​​​គណបក្ស​​​ប្រឆាំង​​​បាន​​​លើក​​​ឡើង​​​ថា លោក​​​ទទួល​​​បាន​​​ព័ត៌មាន​​​មក​​​ថា គណបក្ស​​​សង្គ្រោះ​​​ជាតិ​​​នឹង​​​មិន​​​ទទួល​​​បាន​​​អាជ្ញាប័ណ្ណ​​​​​​សម្រាប់​​​បើក​​​ស្ថានីយ​​​ទូរទស្សន៍​​​ប្រើ​​​ប្រព័ន្ធ​​​អាណាឡូក​​​ ដែល​​​ទូរទស្សន៍​​​ភាគច្រើន​​​នៅ​​​ក្នុង​​​ប្រទេស​​​កម្ពុជា​​​កំពុង​​​ប្រើ​​​នោះ​​​ឡើយ​​​។ លោក សម រង្ស៊ី បាន​​​បញ្ចប់​​​ការ​​​ធ្វើ​​​ពហិការ​​​មិន​​​ចូល​​​សភា​​​របស់​​​គណបក្ស​​​សង្គ្រោះ​​​ជាតិ​​​​​​ បន្ទាប់​​​ពី​​​​​​​​​​​​​​​​​​មាន​​​កិច្ច​​​ព្រមព្រៀង​​​កាល​​​ពីថ្ងៃ​​​ទី​​​២២​​​ ខែ​​​កក្កដា​​​ ជា​​​មួ​​​យ​​​លោក​​​នាយក​​​រដ្ឋមន្ត្រី​​​ ហ៊ុន សែន។ កិច្ច​​​ព្រម​​​ព្រៀង​​​នេះ​​​ក៏​​​រួម​​​មាន​​​ទាំង​​​ការ​​​សន្យា​​​ផ្តល់​​​អាជ្ញាប័ណ្ណ​​​បើក​​​ស្ថាន​​​ីយ​​​ទូរទស្សន៍​​​ផង​​​ដែរ​​​។ លោក សម រង្ស៊ី បាន​​​មាន​​​ប្រសាសន៍​​​កាល​​​ពី​​​ថ្ងៃ​​​ពុធ​​​ថា “ថ្ងៃ​​​េនះ​​​ខ្ញុំ​​​ទទួល​​​បាន​​​ចម្លើយ​​​ [ពីរដ្ឋាភិបាល] មក​​​ថា គោល​​​ការណ៍​​​នេះ​​​នៅតែ​​​ដដែល ប៉ុន្តែ  ពួក​​​គេ​​​បាន​​​លើក​​​ឡើង​​​ពី​​​បញ្ហា​​​បច្ចេកទេស​​​ ហើយ​​​​​​ថា បច្ចេកវិទ្យា​​​សព្វថ្ងៃ គឺ​​​ប្រព័ន្ធ​​​អាណាឡូក​​​ ហើយ​​​ទៅ​​​ថ្ងៃ​​​អនាគត​​​​​​គេ​​​នឹង​​​ឈប់​​​ប្រើ​​​ប្រព័ន្ធ​​​នេះ​​​ហើយ​​​”។ លោក​​​បាន​​​មាន​​​ប្រសាសន៍​​​បន្ត​​​ថា “គេ​​​កំពុង​​​វិវឌ្ឍ​​​ទៅ​​​រក​​​ការ​​​ចាប់​​​ផ្តើម​​​ប្រើ​​​ប្រព័ន្ធ​​​ ឌីជីថល​​​​​​ហើយ​​​ពីរ​​​បី​​​ឆ្នាំ​​​ទៀត​​​ប្រព័ន្ធ​​​ឌីជីថល​​​នេះ​​​នឹង​​​​​​ចាប់​​​ផ្តើម​​​មាន​​​ដំណើរ​​​ការ​​​ហើយ​​​”។ លោក សម រង្ស៊ី បាន​​​លើក​​​ឡើង​​​ទៀត​​​ថា គណបក្ស​​​សង្គ្រោះ​​​ជាតិ​​​នឹង​​​ទទួល​​​យក​​​ឱកាស​​​បង្កើត​​​ស្ថាន​​​ីយ​​​ទូរទស្សន៍​​​ប្រើ​​​ប្រព័ន្ធ ឌីជីថល​​​នេះ ប៉ុន្តែ លោក​​​ចង់​​​បើក​​​ស្ថានីយទូរទស្សន៍​​​ដែល​​​ប្រើ​​​ប្រព័ន្្ធ អាណាឡូក​​​ភ្លាមៗ​​​ជាមុន​​​សិន​​​។ លោក​​​បានមាន​​​ប្រសាសន៍​​​ថា “យើង​​​នឹង​​​ស្វែង​​​រក​​​ហ្វ្រេកង់​​​ ព្រោះ​​​ក្រសួង​​​ព័ត៌​​​មាន​​​បាន​​​បញ្ជាក់​​​ថា បច្ចុប្បន្ន​​​​​​គ្មាន​​​ហ្វ្រេកង់​​​ទំនេរ​​​សម្រាប់​​​ប្រព័ន្ធ​​អាណាឡូក​​​នោះទេ​​​ ប៉ុន្តែ យើង​​​ដឹង​​​ថា ​​​មាន​​​ក្រុមហ៊ុន​​​ និង​​​ឧកញ៉ា​​​មួយ​​​ចំនួន​​​​​​ដែល​​​ទទួល​​​បាន​​​ហ្វ្រេកង់​​​ ហើយ​​​មិន​​​ទាន់​​​ប្រើ​​​ប្រាស់​​​”។ ប្រទេស​​​កម្ពុជា​​​គ្រោង​​​ប្តូរ​​​ពី​​​ស្ថានីយទូរទស្សន៍​​​ប្រើ​​​ប្រព័ន្ធ​​​អាណាឡូក ទៅប្រព័ន្ធ​​​ឌីជីថល ឲ្យ​​​ចប់​​​សព្វគ្រប់​​​នៅ​​​ឆ្នាំ​​​២០១៥​​​ ប៉ុន្តែ គម្រោង​​​នេះ​​​ត្រូវ​​​បាន​​​ពន្យា​​​ពេល​​​ដល់​​​ឆ្នាំ​​​២០១៨​​​។ បច្ចេក​​​វិទ្យា​​​នេះ​​​តម្រូវ​​​ឲ្យ​​​ទស្សនិកជន​​​ត្រូវ​​​ទិញ​​​ទូរទស្សន៍​​​ឌីជីថល​​​ ឬទិញ​​​ប្រអប់​​​ “Top Box” ដែល​​​មាន​​​តម្លៃ​​​២៦​​​ដុល្លារ​​​ដើម្បី​​​ប្តូរ​​​ពីប្រព័ន្ធ​​​អាណាឡូក​​​ទៅ​​​ប្រព័ន្ធ​​​ឌីជីថល​​​។ ការ​​​បោះ​​​ឆ្នោត​​​ឃុំ​​​-សង្កាត់​​​គ្រោង​​​ធ្វើ​​​ឡើង​​​នៅ​​​ខែ​​​កុម្ភៈ​​​ឆ្នាំ​​​២០១៧​​​ ហើយ​​​ការ​​​បោះឆ្នោត​​​ជាតិ​​​លើក​​​ក្រោយ​​​នឹង​​​ត្រូវ​​​ធ្វើ​​​ឡើង​​​នៅ​​​ខែ​​​កុម្ភៈ ឆ្នាំ​​​២០១៨។ លោក ខៀវ កាញារីទ្ធ បាន​​​លើក​​​ឡើង​​​ថា គណបក្ស​​​សង្គ្រោះ​​​ជាតិ​​​អាច​​​ចាប់​​​ផ្តើម​​​ធ្វើ​​​ការ​​​ផ្សាយ​​​តាម​​​ប្រព័ន្ធ​​​​​​ឌីជីថល​​​បាន​​​នៅ​​​ពេល​​​ឥឡូវ​​​ប្រសិនបើ​​​ខ្លួន​​​ចង់។ លោក​​​​​​បាន​​​លើក​​​ឡើង​​​តាម​​​រយៈ​​​សារ​​​មួយ​​​​​​​​​​​​​​​ក្នុង​​​ហ្វេស​​​ប៊ុក​​​ថា “យើង​​​គ្មាន​​​ហ្វ្រេកង់​​​​​​ទំនេរ​​​សម្រាប់​​​ការ​​​បង្កើត​​​ស្ថានីយ​​​ទូរទស្សន៍​​​ប្រើ​​​ប្រព័ន្ធ​​​អាណាឡូក​​​នោះ​​​ឡើយ​​​ ប៉ុន្តែ ប្រសិនបើ​​​លោក សម រង្ស៊ី ចាប់​​​ផ្តើម​​​ដោយ​​​ប្រើ​​​តាម​​​ប្រព័ន្ធ​​​ឌីជីថល​​​នោះ​​​វា​​​អាច​​​ត្រូវ​​​បាន​​​ផ្សព្វ​​​ផ្សាយ​​​តាម​​​រយៈ​​​ក្រុមហ៊ុន​​​ទូរទស្សន៍​​​ខ្សែ​​​កាប ឬ​​​តាម​​​ប្រអប់​​​ Top Box ផ្ទាល់​​​ខ្លួន​​​របស់​​​​​​​​​​​​[ប្រជា​​​ពល​​​រដ្ឋ​​​]”។ លោក ខៀវ កាញារីទ្ធ បាន​​​លើក​​​ឡើង​​​ទៀត​​​ថា វា​​​មិន​​​យុត្តិធម៌​​​ទេ ដែល​​​លោក​​​ សម រង្ស៊ី អះ​​​អាង​​​ថា រដ្ឋាភិបាល​​​ប្តូរ​​​ជំហរ​​​របស់​​​ខ្លួន​​នោះ​​​ ព្រោះថា លោក​​​នាយក​​​រដ្ឋមន្ត្រី ហ៊ុន សែន បាន​​​សន្យា​​​​​​ផ្តល់​​​ឲ្យ​​​គណបក្ស​​​សង្គ្រោះ​​​ជាតិ​​​ត្រឹមតែ​​​អាជ្ញាប័ណ្ណ​​​សម្រាប់​​​បើក​​​ស្ថានីយ​​​ទូរទស្សន៍​​​ប្រើ​​​ប្រព័ន្ធ​​​ឌីជីថល​​​ជា​​​ប្រព័ន្ធ​​​មួយ​​​លៃ​​​លក​​​ទុក​​​សម្រាប់​​​ទូរទស្សន៍​​​ជាតិ​​​កម្ពុជា​​​​​​​​​ប៉ុណ្ណោះ​​​។ លោក​​​បាន​​​មាន​​​ប្រសាសន៍​​​បន្ថែម​​​ថា “គាត់​​​មួល​​​បង្កាច់​​​ការ​​​ពិត​​​។ លោក​​​នាយក​​​រដ្ឋមន្ត្រី​​​ ហ៊៊ុន សែន បាន​​​ប្រាប់​​​គាត់​​​ថា ទូរទស្សន៍​​​ជាតិ​​​កម្ពុជា​​​​​​នឹង​​​ប្រើ​​​ប្រព័ន្ធ​​​ឌីជីថល​​​នៅ​​​ពីរ​​​បី​​​ឆ្នាំ​​​ទៀត​​​ ប៉ុន្តែ បើ​​​យោង​​​តាម​​​អ្វី​​​ដែល​​​យើង​​​ព្រមព្រៀង​​​​​​នោះ​​​គឺ​​​ថា ផ្នែក​​​មួយ​​​នៃ​​​ហ្វ្រេកង់ទូរទស្សន៍​​​ប្រើ​​​ប្រព័ន្ធ​​​ឌីជីថល​​​របស់​​​​​​ទូរទស្សន៍​​​ជាតិ នឹង​​​ត្រូវ​​​ផ្តល់​​​ទៅ​​​ឲ្យ​​​ស្ថាន​​​ីទូរទស្សន៍​​​របស់​​​គាត់ ហើយ​​​គាត់​​​អាច​​​ចាប់ផ្តើម​​​នៅពេល​​​ណា​​​ក៏​​​បាន​​​”។ រដ្ឋមន្ត្រី​​​ក្រសួង​​​ព័ត៌​​​មាន​​​រូប​​​នេះ​​​បាន​​​មាន​​​ប្រសាសន៍​​​ទៀត​​​ថា “ខ្ញុំ​​​គិត​​​ថា គាត់​​​មិន​​​យល់​​​ពី​​​បច្ចេក​​​ទេស​​​នោះ​​​ទេ​​​ ប៉ុន្តែ គាត់​​​ព្យាយាម​​​ធ្វើ​​​ឲ្យ​​​វា​​​ក្លាយ​​​ជា​​​រឿង​​​នយោបាយ​​​ទៅវិញ។ គាត់​​​ចាំ​​​បាច់​​​ត្រូវ​​​ការ​​​​​​តែ​​​បញ្ជូន​​​អ្នក​​​បច្ចេកទេស​​​មក​​​ពិភាក្សា​​​ជាមួយ​​​យើង​​​ជា​​​ជាង​​​យក​​​ការ​​​ពិត​​​ធ្វើ​​​ជា​​​រឿង​​​នយោបាយ”។ នៅ​​​ថ្ងៃ​​​ដែល​​​លោកនាយក​​​រដ្ឋមន្ត្រី​​​ ហ៊ុន សែន បាន​​​ប្រកាស​​​ពី​​​ការ​​​សន្យា​​​​​​​​​​​​​​​​​​​​​​​​​​​ផ្តល់​​​អាជ្ញាប័ណ្ណ​​​ដើម្បី​​​បើក​​​ស្ថានីយ​​​ទូរទស្សន៍​​​ដ​​​ល់​​​​​​គណបក្ស​​​ប្រឆាំង​​​នៅ​​​ក្នុង​​​សុន្ទរកថា​​​មួយ​​​​​​កាល​​​ពី​​​ថ្ងៃ​​​ទី​​​១១ ខែមិថុនា​​​ លោក ខៀវ កាញារីទ្ធ ក៏​​​បាន​​​ប្រាប់​​​អ្នក​​​យក​​​ព័ត៌មាន​​​ដែរ​​​ថា អាជ្ញាប័ណ្ណ​​​បើ​​​ក​​​ស្ថានីយ​​​ទូរទស្សន៍​​​ប្រើ​​​ប្រព័ន្ធ​​​ឌីជីថល​​​ត្រូវ​​​បាន​​​លៃលកទុក​​​​​​សម្រាប់​​​គណបក្ស​​​ប្រឆាំង​​​រួច​​​ហើយ​​​។ នៅ​​​ពេល​​​សួរ​​​អំពី​​​ការ​​​អះអាង​​​របស់​​​លោក សម រង្ស៊ី ដែល​​​ថា អ្នក​​​ជំនួញ​​​មួយ​​​ចំនួន​​​នៅ​​​មាន​​​អាជ្ញាប័ណ្ណ​​​ដែល​​​មិនទាន់​​​ប្រើ​​​ប្រាស់​​​ លោក ខៀវ កាញារីទ្ធ បាន​​​លើក​​​ឡើង​​​ថា លោក​​​នឹង​​​ស្វាគមន៍​​​ចំពោះ​​​ព័ត៌មាន​​​បន្ថែម​​​។ លោក​​​បាន​​​មានប្រសាសន៍​​​ថា “ប្រាប់​​​ឈ្មោះ​​​មក​​​ខ្ញុំ​​​មក​​​។ ព្រោះ​​​ក្រសួង​​​របស់​​​ខ្ញុំ​​​ក៏​​​កំពុង​​​តែ​​​ព្យាយាម​​​ទទួល​​​យក​​​ប៉ុស្តិ៍​​​​​​ពីរ​​​បី​​​បន្ថែម​​​ទៀត​​​ផង​​​ដែរ”។ លោក យឹម សុវណ្ណ អ្នកនាំពាក្យ​​​គណបក្ស​​​សង្គ្រោះ​​​ជាតិ​​​បាន​​​លើក​​​ឡើង​​​កាល​​​ពី​​​ម្សិលមិញ​​​ថា គណបក្ស​​​ប្រឆាំង​​​​​​​​​ដឹង​​​អំពី​​​លក្ខន្តិកៈ​​​នៃ​​​កិច្ច​​​ព្រមព្រៀង​​​កាល​​​ពី​​​ថ្ងៃទី​​​២២ ខែ​​​កក្កដា​​​នោះ​​​ដែល​​​មាន​​​ន័យ​​​ថា គណបក្ស​​​​​​នឹង​​​ទទួល​​​បាន​​​​​​​​​​​​​​​​​​​​​​​​​​​​​​អាជ្ញាប័ណ្ណ​​​បើក​​​ស្ថានីយ​​​ទូរទស្សន៍​​​ប្រើ​​​ប្រព័ន្ធ​​​អាណាឡូក​​​។ លោក​​​ក៏​​​បាន​​​លើក​​​​​​ឡើង​​​ម្តង​​​ទៀត​​​អំពីការ​​​ច្រាន​​​ចោល​​​របស់​​​លោក សម រង្ស៊ី ចំពោះ​​​ការ​​​​​អះអាង​​​ដែល​​​ថា គ្មាន​​​ហ្វ្រេកង់​​​ទំនេរ​​​ផងដែរ​​​។ លោក​​​បាន​​​មាន​​​ប្រសាសន៍​​​ថា “វា​​​មិន​​​ពិត​​​ទេ​​​។ អាជ្ញាប័ណ្ណ​​​ជា​​​ច្រើន​​​កំពុង​​​ត្រូវ​​​បាន​​​រក្សា​​​ទុក​​​ដោយ​​​អ្នក​​​ជំនួញ​​​​​​មួយ​​​ចំនួន​​​ ហើយ​​​ខ្ញុំ​​​គិត​​​ថា យើង​​​នឹង​​​មាន​​​ស្ថានីយ​​​ទូរទស្សន៍​​​ប្រើ​​​ប្រព័ន្ធ​​​អាណាឡូក​​​មួយ​​​។ ខ្ញុំ​​​ចង់​​​ដឹង​​​ថា តើ​​​​​​ប៉ុស្តិ៍​​​លេខ​​​៥ និង​​​ប៉ុស្តិ៍​​​​​​លេខ៧​​​នៅ​​​ទី​​​ណា​​​ទៅ?​​​ យើង​​​អាច​​​រក​​​ឃើញ​​​អ្នក​​​ដែល​​​មាន ហ្វ្រេកង់​​​​​​នេះ​​​។ ខ្ញុំ​​​គិត​​​ថា ក្រសួង​​​ព័ត៌មាន​​​មាន​​​ព័ត៌មាន​​​នេះ​​​”។ លោក​​​ យឹម សុវណ្ណ បាន​​​លើក​​​ឡើង​​​បន្ថែម​​​ទៀត​​​ថា មេដឹក​​​នាំ​​​គណបក្ស​​​សង្គ្រោះ​​​ជាតិ​​​នឹង​​​ចរចា​​​ជាមួយ​​​រដ្ឋាភិបាល​​​ដើម្បី​​​​​​​​​​ទទួល​​​បាន​​​ស្ថានីយ​​​ទូរទស្សន៍​​​ដែល​​​ប្រើ​​​ប្រព័ន្ធ​​​អាណាឡូក​​​។ ក្រុមហ៊ុន​​​ដែល​​​មាន​​​ឈ្មោះ​​​ថា  ប្រព័ន្ធ​​​ផ្សព្វ​​​ផ្សាយ​​​ឯករាជ​​​កម្ពុជា (Cambodia Independent Media) ត្រូវ​​​បាន​​​ចុះ​​​បញ្ជី​​​ដោយ​​​គណបក្ស​​​សង្គ្រោះ​​​ជាតិ​​​កាល​​​ពី​​​ខែ​​​មុន ដើម្បី​​​ទទួល​​​បាន​​​អាជ្ញាប័ណ្ណ​​​បើក​​​ស្ថានីយ​​​ទូរទស្សន៍​​​ ដែល​​​នឹង​​​ជា​​​ទូរទស្សន៍​​​របស់​​​គណបក្ស​​​ប្រឆាំង​​​ដំបូង​​​គេ​​​នៅ​​​កម្ពុជា​​​។ ស្ថានីយ​​​ទូរទស្សន៍​​​ប្រើ​​​ប្រព័ន្ធ​​​អាណាឡូក​​​ទាំង​​​ប្រាំ​​​បួន​​​សព្វ​​​ថ្ងៃ​​​ក្នុង​​​ប្រទេស​​​កម្ពុជា​​​​​​គឺ​​​សុទ្ធ​​​តែ​​​ត្រូវ​​​បាន​​​គ្រប់​​​គ្រង​​​ដោយ​​​មន្ត្រី​​​គណបក្ស​​​ប្រជាជន​​​កម្ពុជា​​​ ឬក៏​​​មាន​​​សម្ព័ន្ធ​​​ភាព​​​ជា​​​មួយ​​​គណបក្ស​​​កាន់​​​អំណាច​​​នេះ​ ហើយ​​​បុគ្គល​​​លេច​​​ធ្លោ​​​របស់​​​គណបក្ស​​​ប្រឆាំង​​​តែង​​​តែ​​​រិះ​​​គន់​​​ជា​​​យូរ​​​មក​​​ហើយ​​​អំពី​​​ការ​​​មិន​​​អនុញ្ញាត​​​ឲ្យ​​​មាន​​​ការ​​​ផ្សាយ​​​ព័ត៌​​​មាន​​​​​​របស់​​​ខ្លួន​​​តាម​​​បណ្តាញ​​​ស្ថានីយ​​​ទូរទស្សន៍​​​ទាំង​​​នេះ​​​៕ស៊ុយ​​​ឈាង​​​​​​​​​​​​​​  

ស្ត្រី​​​ជន​​​ជាតិ​​​ខ្មែរ​​​ដែល​​​ត្រូវ​​​ប្តី​​​ជន​​​ជន​​​កូរ៉េ​​​របស់​​​ខ្លួន​​​​​​សម្លាប់​​​ក្នុង​​​ប្រទេស​​​កូរ៉េ​​​ខាង​​​ត្បូង​​​​​​ក្នុង​​​គោល​​​បំណង​​​ទទួល​​​បាន​​​ប្រាក់​​​ជាង​​​៨,៥​​​លាន​​​ដុល្លារ​​​ ពី​​​ក្រុមហ៊ុន​​​ធានារ៉ាប់​​​រង​​​អាយុជីវិត​​​​​​ត្រូវ​​​បាន​​​កំណត់​​​អត្ត​​​សញ្ញាណ​​​កាល​​​ពី​​​ម្សិល​​​មិញ​​​ ដោយ​​​ក្រសួង​​​ការ​​​បរទេស​​​ ដែល​​​​​លើក​​​ឡើង​​​ថារដ្ឋាភិបាល​​​កំពុង​​​ចាត់​​​វិធាន​​​ការដើម្បី​​​ទាម​​​ទារ​​​​​​សំណង​​​ជំងឺ​​​ចិត្ត​​​ជូន​​​គ្រួសារ​​​ស្ត្រី​​​រង​​​គ្រោះ​​​។ ក្រសួង​​​ការបរទេស​​​បាន​​​ចេញ​​​សេចក្តី​​​ថ្លែង​​​ការណ៍​​​មួយ​​​ ដែល​​​ចុះ​​​ហត្ថលេខា​​​ដោយ​​​លោក កុយ គួង អ្នក​​​នាំ​​​ពាក្យ​​​របស់​​​ក្រសួង​​​នេះ បន្ទាប់​​​ពី​​​មាន​​​អត្ថ​​​បទ​​​កាសែត​​​មួយ​​​ចុះ​​​ផ្សាយ​​​នៅ​​​ក្នុងទំព័រ​​​កាសែត Korea JoongAng Daily កាល​​​ពី​​​ម្សិលមិញ ដោយ​​​ដក​​​ស្រង់​​​សំដី​​​របស់​​​នគរ​​​បាល​​​កូរ៉េ​​​ខាង​​​ត្បូង​​​មក​​​ថា ជន​​​សង្ស័យ​​​អាយុ​​​៤៥​​​ឆ្នាំ​​​ ដែល​​​គេ​​​ប្រាប់​​​ឲ្យដ​​​ឹង​​​ត្រឹមតែ​​​ថា​​​​​​​​​មាន​ឈ្មោះ​ “Lee” នោះ​​​បាន​​​ឲ្យ​​​ថ្នាំ​​​ងងុយ​​​ដេក​​​ទៅ​​​ប្រពន្ធ​​​ជន​​​ជាតិ​​​ខ្មែរ​​​ដែល​​​មាន​​​ផ្ទៃ​​​ពោះ​​​របស់ខ្លួនលេប​​​មុន​​​ពេល​​​​​​បើក​​​រថយន្ត​​​​​​ទៅ​​​បុក​​​រថយន្ត​​​ធុន​​​ធំ​​​ចត​​​នៅ​​​ស្ងៀម​មួួយ​គ្រឿង​ ខណៈ​​​នាង​​​អង្គុយ​​​នៅ​​​កៅអី​​​មុខ​​​ជាប់​​​តៃកុង​​​កាល​​​ពី​​​ពេល​​​ទៀប​​​ភ្លឺ​​​ឈាន​ចូល​​​​​​ថ្ងៃ​​​ទី​​​២៣​​​ ខែ​​​សីហា។ អត្ថបទ​​​កាសែត​​​នេះ​​​មាន​​​ខ្លឹមសារ​​​ថា “ករណី​​​នេះ​​​ស្ទើរ​​​តែ​​​ត្រូវ​​​បាន​​​ចាត់​​​ទុក​​​ថា ជា​​​គ្រោះ​​​ថ្នាក់​​​ដ៏​​​សោកនាដកម្ម​​​មួយ​​​​​​ រហូត​​​ដល់​​​នគរ​​​បាល​​​បាន​​​ដឹង​​​ថា លោក Lee បាន​​​ទិញ​​​​​​ធានា​​​រ៉ាប់​​​រង​​​ចំនួន​​​២៦​​​ដាច់​​​ដោយ​​​ពី​​​គ្នា​​​ឲ្យ​​​ប្រពន្ធ​​​របស់​​​ខ្លួន​​​ ដែល​​​គាត់​​​នឹង​​​ទទួល​​​បាន​​​ប្រាក់​​​សំណង​​​មក​​​វិញ​​​សរុប​​​ចំនួន​​​៤,៦​​​ពាន​​​់​​​លាន​​​វ៉ុន​​​ [៨.៦៤០.៨៦៤ដុល្លារ​​​]​​​ នោះ”។ អត្ថបទ​​​កាសែត​នេះ​​​បាន​​​ចុះ​​​ផ្សាយ​​​បន្ត​​​ថា បុរស​​​រូប​​​នេះ​​​​​​បាន​​​បដិសេធ​​​ចំពោះ​​​ការ​​​ចោទ​​​ប្រកាន់​​​របស់​​​នគរ​​​បាល​​​ ដែល​​​ថា ករណី​​​នេះ​​​ជា​​​អំពើ​​​ឃាត​​​កម្ម​​​នោះ​​​។ ក្រសួង​​​ការបរទេស​​​បាន​​​កំណត់​​​អត្ត​​​សញ្ញាណ​​​ស្ត្រី​​​រងគ្រោះ​​​ថា​មាន​​​ឈ្មោះ អីុ ស៊ីឡែន មាន​​​ស្រុក​​​កំណើត​​​នៅ​​​ភូមិ​​​ក្តល់លើ ឃុំទ្រា ស្រុក​​​ក្រូច​​​ឆ្មារ ខេត្ត​​​ត្បូង​​​ឃ្មុំ​​​ ។ សេចក្តីថ្លែង​​​ការណ៍​​​របស់​​​ក្រសួង​​​នេះមាន​​​ខ្លឹមសារ​​​ដូច្នេះ​​​ថា “ស្ត្រី​​​រង​​​គ្រោះ​​​បាន​​​រៀប​​​ការ​​​​​​និង​​​រស់​​​នៅ​​​ជាមួយ​​​ប្តី​​​ជន​​​ជាតិ​​​កូរ៉េ​​​ នៅ​​​ឆ្នាំ​​​២០០៨​​​ រហូត​​​មក​​​ដល់​​​ពេល​​​នេះ​​​មាន​​​កូន​​​ស្រី​​​មួយ​​​អាយុ​​​៥​​​ឆ្នាំ​​​”។ សេចក្តី​​​ថ្លែង​​​ការណ៍​​​នេះ​​​មាន​​​ខ្លឹម​​​សារ​​​បន្ត​​​ថា “ក្រសួង​​​ការបរទេស​​​ និង​​​សហប្រតិបត្តិការ​​​អន្តរ​​​ជាតិ​​​បាន​​​ណែនាំ​​​ស្ថាន​​​ទូត​​​កម្ពុជា​​​ [នៅក្នុង​​​ទីក្រុង​​​សេអ៊ូល​​​]​​​ ឲ្យ​​​ប្តឹង​​​ទាម​​​ទារ​​​សំណង​​​ជំងឺ​​​ចិត្ត​​​ជូន​​​គ្រួសារ​​​សព្វ​​​ និង​​​សំណង​​​សម្រាប់​​​ចិញ្ចឹម​​​កូន​​​ស្រី​​​ដែល​​​នៅ​​​រស់​​​រាន​​​មាន​​​ជីវិត​​​”។ សេចក្តីថ្លែង​​​ការណ៍​​​នេះមាន​​​ខ្លឹម​​​សារ​​​បន្ថែម​​​ថា “ចំពោះ​​​ករណីខាង​​​លើ​​​នេះ​​​ លោក​​​ជំទាវ​​​ ប្រធានាធិបតី​​​នៃ​​​សាធារណរដ្ឋ​​​កូរ៉េ [Park Geun-hye]​​​ មាន​​​ការ​​​ចាប់​​​អារម្មណ៍​​​យ៉ា​​​ង​​​ខា្លំង​​​ ហើយ​​​ទូរទស្សន៍​​​កូរ៉េ​​​​​​ល្បីៗ​​​មួយ​​​ចំនួន គ្រោង​​​ធ្វើ​​​ដំណើរ​​​មក​​​កម្ពុជា​​​ដើម្បី​​​ថត​​​ និង​​​សម្ភាស​​​គ្រួសារ​​​សព្វ​​​ស្ត្រី​​​រងគ្រោះ នៅ​​​ខេត្ត​​​ត្បូង​​​ឃ្មុំ​​​ នាពេល​ខាង​​​មុខ”។ កាល​​​ពីថ្ងៃ​​​ពុធ លោក សុទ្ធ ឌីណា ឯកអគ្គរាជទូត​​​កម្ពុជា​​​ប្រចាំ​​​ប្រទេស​​​កូរ៉េ​​​ខាង​​​ត្បូង​​​បាន​​​មាន​​​ប្រសាសន៍​​​ថា លោក​​​កំពុង​​​ធ្វើ​​​ការ​​​ជាមួយ​​​នគរ​​​បាល​​​កូរ៉េ​​​ខាង​​​ត្បូង​​​យ៉ាង​​​យក​​​ចិត្ត​​​ទុក​​​ដាក់​​​ដើម្បី​​​បញ្ជាក់​​​ឲ្យ​​​បាន​​​ច្បាស់​​​​អំពី​​​ការ​​​ស្លាប់​​​របស់​​​អ្នកស្រី អីុ ស៊ីឡែន៕ស៊ុយឈាង​​​​​​​​​​​​​​​  

អាជ្ញាធរ​អប្សរា ដែល​គ្រប់គ្រង​ឧទ្យាន​បុរាណ​អង្គរ​នៅ​ក្រុង​សៀមរាប កាលពី​ថ្ងៃ​ពុធ​បាន​បដិសេធ​ការ​អះអាង​របស់​លោក​ ម៉ម សូណង់ដូ ម្ចាស់​វិទ្យុ​ដ៏​មាន​ប្រជាប្រិយ​កាលពី​សប្តាហ៍​មុន ដែល​ថា ឧទ្យាន​ប្រាសាទ​អង្គរ​ “ត្រូវ​បាន​ជួល” ឲ្យ​ក្រុមហ៊ុន​វៀតណាម។ លោក សូណង់ដូ អ្នក​រិះគន់​រដ្ឋាភិបាល​ល្បី​ឈ្មោះ ដែល​ជា​ម្ចាស់​ស្ថានីយ​វិទ្យុ​សំបុក​ឃ្មុំ បាន​និយាយ​ក្នុង​ពេល​ផ្សាយ​កាលពី​ថ្ងៃ​សុក្រ​ថា ឧទ្យាន​រមណីយ​ដ្ឋាន​ប្រវត្តិ​សាស្ត្រ​អង្គរ​ត្រូវ​បាន​ជួល​ទៅ​ឲ្យ​ក្រុមហ៊ុន​វៀតណាម​សម្រាប់​រយៈ​ពេល​៩៩​ឆ្នាំ។ លោក ម៉ម សូណង់ដូ បាន​មាន​ប្រសាសន៍​ថា “ខ្ញុំ​ចង់​និយាយ​ថា មិន​ថា​យើង​ខ្សោយ​និង​ប្រឈម​ហានិភ័យ​យ៉ាងណា​ទេ យើង​មិន​អាច​ជួល​អង្គរ​វត្ត​ទៅ​ឲ្យ​ក្រុមហ៊ុន​ណាមួយ​ឡើយ។ តើ​មាន​មូលហេតុ​អ្វី? ដឹង​ទេ ព្រោះ​អង្គរ​វត្ត​ជា​អត្តសញ្ញាណ​ជាតិ​របស់​យើង។ មាន​រូប​អង្គរវត្ត​លើ​ទង់ជាតិ​របស់​យើង មាន​អត់? “ដូច្នេះ បើ​ពួកគេ​ជួល​វា​ទៅ​ឲ្យ​វៀតណាម លក់​វា បញ្ចាំ​វា​៩៩​ឆ្នាំ តើ​ទង់ជាតិ​យើង​មាន​ន័យ​អី​ទៀត?” ក្នុង​សេចក្តី​បំភ្លឺ​មួយ​កាលពី​ថ្ងៃ​ពុធ អាជ្ញាធរ​អប្សរា​បាន​បញ្ជាក់​ថា អាជ្ញាធរ​នេះ​តែ​មួយ​គត់​ជា​ស្ថាប័ន​មាន ​”បេសកកម្ម​ការពារ រៀបចំ និង អភិរក្ស​មណីយ​ដ្ឋាន​ប្រវត្តិ​សាស្ត្រ​អង្គរ”។ សេចក្តី​បំភ្លឺ​ឲ្យ​ដឹង​ថា “អង្គរវត្ត​មិន​បាន​ជួល​ឲ្យ​ក្រុមហ៊ុន​ឯកជន​ណាមួយ ឬ​ជន​បរទេស​ណា​ម្នាក់​ ឬ បញ្ចាំ ឬ ជួល​រយៈ​ពេល​៩៩​ឆ្នាំ​ ដូច​ដែល​បាន​លើក​ឡើង​ដោយ​ស្ថានីយ​វិទ្យុ​សំបុក​ឃ្មុំ​ឡើយ”។ បើទោះជា​ ក្រុមហ៊ុន​សូគីម៉ិច ដែល​ជា​របស់​លោក សុខ គង់ ពាណិជ្ជករ​ដ៏​មាន​ឥទ្ធិពល ដែល​ជា​ជនជាតិ​វៀតណាម […]

ខណៈ​ដែល​ពេល​កំណត់​ដាក់​ដោយ​សាលា​ក្រុង​ឲ្យ​ប្រជាពលរដ្ឋ​នៅ​ភូមិ​មួយ​ក្នុង​ខណ្ឌ​ឫស្សីកែវ ក្រុង​ភ្នំពេញ ចេញពី​តំបន់​នោះជិត​មក​ដល់ ពលរដ្ឋ​ប្រហែល​១០០​នាក់​បាន​ដាក់​ញត្តិ​ទៅ​រដ្ឋ​សភា​កាលពី​ថ្ងៃ​ពុធ ជា​កិច្ច​ប្រឹងប្រែង​ចុងក្រោយ ដើម្បី​បញ្ចុះ​បញ្ចូល​សមាជិក​សភា​ឲ្យ​ជួយ​ធ្វើ​អន្តរាគមន៍​តាង​នាម​ពួក​ខ្លួន។ ញត្តិ​នោះ​បានប្រគល់​ទៅ​លោក ជា ប៉ូច និង​លោក ចាន់ ចេង សមាជិក​សភា​គណបក្ស​សង្គ្រោះ​ជាតិ​នៅ​ក្រៅ​រដ្ឋសភា និង​ក៏​បាន​ប្រគល់​ទៅ​លោក គង់ ចំរើន អគ្គលេខាធិការ​នៅ​ខុទ្ទកាល័យ​របស់​លោក​នាយក​រដ្ឋមន្ត្រី ហ៊ុន សែន នៅ​ពេល​ដែល​អ្នក​ភូមិ​ដើរ​ហែ​កាត់​សួន​វត្ត​បទុម​ផង​ដែរ។ ប្រជាពលរដ្ឋ​ជាង៦០០​នាក់​ដែល​រស់​នៅ​ក្នុង​ភូមិ​បឹងឈូក សង្កាត់​គីឡូម៉ែត្រ​លេខ​ប្រាំមួយ បាន​ទទួល​ការ​ជូន​ដំណឹង​មួយ​ពី​សាលាក្រុង​កាលពី​សប្តាហ៍​មុន ដែល​ចុះ​ហត្ថលេខា​ដោយ​អភិបាល​ខណ្ឌ​ ធុយ សុខន ដោយ​ជូន​ដំណឹង​ពួកគាត់​ថា ពួកគាត់​មាន​ពេល​១៥​ថ្ងៃ​ចាប់ពី​ថ្ងៃ​ចុះ​ហត្ថ​លេខា​ គឺ​ថ្ងៃ​ទី​១៤​ខែ​វិច្ឆិកា ត្រូវ​រើ​ផ្ទះ​សំបែង​និង​ទ្រព្យសម្បត្តិ​របស់​ខ្លួន បើ​ពុំ​នោះ​ទេ ត្រូវ​ប្រឈម​នឹង​ការ​បណ្តេញ​ចេញ។ សេចក្តី​ជូន​ដំណឹង​មាន​ខ្លឹមសារ​ថា អាជ្ញាធរ​ខណ្ឌ​មាន​ផែនការ​ពង្រីក​ផ្លូវ​លេខ​១៨០០​ ដែល​ឆ្លងកាត់​ភូមិ​នេះ ហើយ​ថា​ផ្ទះ​សំបែង​របស់​ពួកគាត់​ស្ថិតនៅ​ចំ​ផ្លូវ​ត្រូវ​ពង្រីក។ ប៉ុន្តែ​បើ​ទោះជា​សេចក្តី​ជូនដំណឹង​ចុះ​ហត្ថលេខា​ជិត​ពីរ​សប្តាហ៍​ហើយ​ក៏ដោយ ក៏​អ្នក​ភូមិ​និយាយ​ថា ពួកគាត់​មិន​បាន​ទទួល​សេចក្តី​ជូនដំណឹង​នោះ​ទេ ទើបតែ​ដឹង​កាលពី​ថ្ងៃ​សុក្រ។ ដូច្នេះ​ពួកគាត់​សល់​ពេល​តែ​ជាង​មួយ​សប្តាហ៍​ដើម្បី​រុះរើ​ផ្ទះ ដែល​ពួកគាត់​ខ្លះ​និយាយ​ថា ពួកគាត់​បាន​មក​រស់​នៅ​តាំងពី​ដើម​ទសវត្សរ៍​ឆ្នាំ​១៩៨០​មក​ម៉្លេះ។ លោក សេង ស្នា អាយុ​៥០​ឆ្នាំ តំណាង​សហគមន៍ បាន​និយាយ​ថា “យើង​បាន​រស់នៅ​ក្នុង​តំបន់​នេះ​តាំងពី​ទីនេះ​គ្មាន​អ្វី​សោះ មានតែ​ព្រៃ​និង​លិច​ទឹក​ប៉ុណ្ណោះ”។ លោក ស្នា បាន​និយាយ​ថា គ្មាន​ផ្លូវ​កាត់​តំបន់​នេះ​ទេ […]

​យោង​តាម​​​ម្ចាស់​អាជីវកម្ម និង​​បណ្តា​អ្នក​ជំនាញ​ខាង​ឧស្សាហកម្ម​កៅ​ស៊ូបាន​ឲ្យ​​ដឹង​ថា ពាណិជ្ជកម្ម​កៅ​ស៊ូឆ្លង​ដែន​ខុស​ច្បាប់ កំពុង​​តែ​កាក់​កប​​​ខ្លាំ​ង​នៅ​ក្នុង​ប្រទេស​កម្ពុជា ស្រប​ពេល​​​​តម្លៃ​​កៅ​ស៊ូ​នៅ​លើ​ទី​ផ្សារ​ពិភពលោក​ធ្លាក់​ចុះ​យ៉ាង​គំហុក ​ហើយ​វា​​​កំពុង​តែ​គំរាម​​កំហែង​​ដល់​ក្រុម​ហ៊ុន​​កែ​ច្នៃ​ស្រប​​ច្បាប់​​​​នានា​​​នៅ​ក្នុង​ប្រទេស​​។ ​នៅឆមាស​ទី​១ដើម​​ឆ្នាំ​នេះ​ តម្លៃ​កៅ​ស៊ូ​​ក្នុង​ស្រុក​​​បាន​ធ្លាក់​​ចុះ​ប្រហែល​៣០​ភាគ​រយ​ដោយ​សារ​តែសម្ពាធ​ពិភពលោក ធ្វើ​ឲ្យ​បណ្តា​រោង​ចក្រ​​​រក្សា​ខំ​​​ប្រតិបត្តិការ​បស់​ខ្លួន​ទាំង​ត្រដរ។ ​​​​​​​​​ ហើយ​ខណៈ​​​ដែល​ពន្ធនាំ​ចេញ​កៅ​ស៊ូធម្មជាតិ​​​ត្រូវ​​​បាន​កំណត់​ន្លោះ​ពី​២​ភាគ​យ​ទៅ​១០​ភាគ​រយ ប្រទេស​​វៀតណាម ​បាន​​ចាត់​វិធាន​​​ការ​បន្ធូរ​​បន្ថយផល​​​ប៉ះ​ពាល់​លើ​កសិករ​ដាំ​កៅស៊ូ​របស់​ខ្លួន ដោយ​កាត់​បន្ថយ​ពន្ធ​នាំ​ចេញ​ពី​៥ភាគ​រយ​មក​នៅ​ត្រឹម​១ភាគ​រយ​កាល​ពី​ខែ​ធ្នូ​ឆ្នាំ​មុន មុន​ពេល​លើក​​​លែង​​​ពន្ធ​​​ទាំង​អស់​​កាល​ពី​​ថ្ងៃ​​​ទី​​​​២​ខែ​តុលា។ លោក ប្រាចាយ៉ា ជុំប៉ាស៊ុត (Prachaya Jumpasut) ​នាយក​គ្រប់​គ្រង​​​​ក្រុម​ហ៊ុន​ The Rubber Economist Ltd ​ជា​​​ក្រុម​ហ៊ុន​វិភាគ​​​អំពី​​ឧស្សាហ​កម្ម​​កៅស៊ូ​​​​ដែល​​​មាន​មូល​ដ្ឋាន​នៅ​ក្នុង​ទីក្រុង​ឡុងដ៍ ​បានមាន​ប្រសាសន៍​ថា ពាណិជ្ជកម្ម​កៅ​ស៊ូ​ខុស​ច្បាប់​​នៅ​អាស៊ី​អាគ្នេយ៍ គឺ​ងាយ​នឹងធ្វើ​ឲ្យ​​ប៉ះ​ពាល់​ដល់​​ពន្ធ​​នាំ​ចេញ​ណាស់។ លោក​បាន​លើក​ឡើង​​នៅ​ក្នុង​អីុម៉េល​​​មួយ​ថា “ការ​រត់ពន្ធ​ពិត​ជា​កើត​មាន​​​មែន​​​រ​វាង​ការ​ធ្វើ​ពាណិជ្ជ​កម្ម​​នៅ​ព្រំ​ដែន។ វា​ទំនង​ជា​​មាន​ច្រើន​​ជាង​នេះ​ ​នៅ​​​ពេលមាន​ការ​កែ​ប្រែ​ពន្ធ​​នាំ​ចេញ”។ លោក ហ្វីលីប ម៉ុននីន (Philippe Monnin) ទីប្រឹក្សា​​ផ្នែក​បច្ចេក​ទេស​​នៅ​ទីភ្នាក់​ងារ​អភិវឌ្ឍន៍​បារាំង (French Development Agency) បាន​​លើក​ឡើង​ថា ​កសិករ​​ដាំ​កៅស៊ូកម្ពុជា ជា​ច្រើន​​បាន​បង្ខំ​ចិត្ត​លក់​​​កៅ​ស៊ូ​របស់​​ខ្លួន​ឲ្យ​ទៅ​​​ឈ្នួញ​កណ្តាល​ នៅ​​​ពេល​​​បណ្តា​រោង​ចក្រ​កែ​ច្នៃ​​​ក្នុង​ស្រុក​​គ្មាន​លទ្ធ​ភាព​ទិញ។ លោក​បាន​​មាន​ប្រសាសន៍​ថា “ដោយ​សារតម្លៃ​ធ្លាក់​ចុះ ​រោង​ចក្រ​មាន​​ប្រាក់​តិច​​តួច​សម្រាប់​​​ទិញ​​​ពីម្ចាស់​ចម្ការ​កៅ​ស៊ូ​តូចៗ​​​ដែល​រាល់​ថ្ងៃ​​ត្រូវ​ស្វែង​រក​អ្នក​លក់ ហើយ​ត្រូវ​​បាន​តម្រូវ​ឲ្យ​លក់​​ទៅឲ្យ​ឈ្មួញ​កណ្តាល​ដែល​លក់​​​ចេញ​​​បន្ត​​​​ទៅ​ថៃ និង​វៀតណាម”។ ទោះ​បី​ជា​​​តម្លៃ​​បាន​​ចាប់​ផ្តើម​រើប​ឡើង​​​បន្ទាប់​ពី​​បណ្តា​ប្រទេស​​​ផលិត​កៅ​ស៊ូ​ធំៗ​នៅ​អាស៊ី បាន​​ព្រម​​ព្រៀង​​កំណត់​តម្លៃ​អប្បបរមា​​​កាល​ពី​ខែ​តុលា​ក្តី ក៏​​បណ្តា​ម្ចាស់​រោង​ចក្រ​​និយាយ​ថា ខ្លួន​នៅ​តែ​មិន​អាច​ប្រកួត​ប្រជែង​​ជា​មួយ​អ្នក​ទិញ​នៅ​ក្នុង​ទី​ផ្សារ​ខ្មៅ​​​​ដែល​​កំពុង​សម្លឹង​​មើល​រក​​​ឱកាស​កេង​ចំណេញ​ពី​ការ​លើក​​​លែង​​​ពន្ធ​​​របស់​ប្រទេស​វៀតណាម។ […]

The Cambodia Daily | All the News Without Fear or Favor | The Daily Newspaper of Record Since 1993